Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen Tatoli/Egas Cristóvão

DILI, 04 dezembru 2019 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur husu Governu atu kumpre promesa kampaña iha eleisaun jerál Parlamentár tinan 2018.

Bainhira governu kumpre ona promesa, liuliu buka fó formasaun integradu ba joven sira, regulariza eis grupu arte marsiál sira, maka Lere fiar katak sei bele redús ka hamenus krime iha rai-laran.

“Problema rai-laran nian ne’e ami ko’alia kona-ba distúrbiu iha fatin-fatin. Dala barak ita temi arte marsiál, maibé ha’u hakarak dehan katak grupu organizadu. Ne’e ita ko’alia kona-ba krime organizadu. Bainhira ita ko’alia kona-ba arte marsiál ka krime sira-ne’ebé komete iha Timor, ne’e normál tanba ita atu halo nusá mós sei mosu nafatin, no ita labele fó sala ba polísia”, Lere deklara hafoin enkontru regulár ho Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, Dili, ohin.

Líder másimu Forsa Armada ne’e konsidera katak situasaun ne’e akontese iha ne’ebé-ne’ebé de’it, maibé bele diminui, bele hamenus ninia grau krime ne’e rasik. Importante Governu tenke kumpre ninia promesa iha kampaña ne’ebé dehan katak bainhira ukun sei organiza arte marsiál.

“Realidade hatudu katak ita-nia juventude dezorganizadu. Ida-idak la’o ninian. Bainhira problema mosu, ita duun ba arte marsiál. Problema ida-ne’e kleur demais ona. Promete atu organiza arte marsiál durante tinan rua ona seidauk realiza. Tuir loloos, Governu tenke organiza ona nune’e Governu rasik bele kontrola”, Lere enkoraja.

Xefe Estadu Maiór F-FDTL ne’e fó ezemplu katak hanesan F-FDTL nian nu’udar militár ida-ne’ebé maka organizadu, kontroladu, fasil atu kontrola no fó órden. Tanba ne’e, Lere husu ba Governu liuliu ministériu relevante buka to’ok meiu ne’ebé di’akliu oinsá bele halo kontrolu ba arte marsiál sira.

Aleinde ne’e, Lere mós sita katak iha arte marsiál balun kontroladu, organizadu, kapa’as loos hanesan Kempo, Taekwondo no seluk tan, ne’ebé tuir ona kompetisaun iha nasionál no internasionál, tanba konsidera hanesan atividade desportiva ida.

“Tanba de’it ita la regulariza maka ita akuza beibeik grupu arte marsiál, no ita mós labele fó sala beibeik ba polísia”, nia informa.

Maski nune’e, Lere mós rekoñese katak, atu evita to’o halakon problema ka krime iha Timor, ne’e difísil no imposível, tanba kaben-na’in sira ka feen ho la’en mós sei baku malu satán joven sira-ne’ebé hasoru malu iha li’ur ne’ebá.

“Maibé ita buka atu siviliza sira hodi manán konsiénsia. Katak, Timor atu la’o ba oin, sidadaun hotu iha devér atu mantein estabilidade”, nia rekomenda.

Jornalista: Cipriano Colo

Editór: Xisto Freitas 

HAKEREK NO HATÁN

Please enter your comment!
Please enter your name here