Ministru Agrikultura no Peskas Joaquim José Gusmão dos Reis Martins. Imajen/Antonio Goncalves.

DILI, 04 dezembru 2019 (TATOLI) – Ministru Agrikultura no Peska, Joaquim José Gusmão dos Reis Martins, informa Ministériu Agrikultura no Peska (MAP) distribui ona fini tonelada 280 ba munisípiu 12 inklui Rejiaun Administrativa Espesiál Oe-Cusse Ambeno (RAEOA) atu kuda bainhira udan monu rai.

“Iha tinan ne’e, ba fini batar no hare ne’e ita distribui hotu ona ba munisípiu sira no fahe ona ba agrikultór sira atubele kuda bainhira udan monu rai”, Ministru Joaquim ba TATOLI iha Palásiu Governu, ohin.

Fini ho totál tonelada 280 ne’e kompostu husi batar tonelada 140 no hare ho tonelada 140. “Ita-nia intervensaun ba fini ne’e iha territóriu tomak liuliu ba área ne’ebé iha irrigasaun boot no área ne’ebé potensiál ba setór agríkola”, katak.

Ba fini batar ne’e, nia dehan MAP halo intervensaun hodi fó, maibé povu agrikultór ne’ebé presiza bele foti, enkuantu ba fini hare ne’e foka liu ba área ne’ebé iha irrigasaun boot.

MAP foku ba irrigasaun boot sira hanesan Oebaba (Zumalai), Karau-Ulun (Same), Maliana I no Maliana II no seluk tan ne’ebé bailoron naruk mós bee iha hela de’it.

MAP mós rekoñese presiza duni halo reabilitasaun ba irrigasaun boot sira hanesan Oebaba, Bonuk, Karau-Ulun, Bebui, Bulutu, Maliana I no Maliana II iha 2020.

Joaquim dehan durante tinan rua laiha osan manutensaun ba irrigasaun hirak ne’e, tanba ne’e rezulta bee komesa halai la tuir dalan hodi sobu natar sira. “Iha orsamentu Jerál Estadu 2020, MAP sei prevee orsamentu atubele reabilita fali irrigasaun boot sira ne’e”, informa.

Polítika MAP fahe fini hodi bele garantia produsaun doméstika liuhusi hasa’e produsaun agrikultura iha rai-laran ho konseitu soberania ai-han no agrikultura sustentavel iha Timor-Leste.

Hahú husi primeiru Governu nia ukun to’o Governu ida agora, MAP mai ho ninia planu no konseitu polítika oin-oin ho objetivu atu dezenvolve setór agrikultura no peska. Planu no polítika hirak ne’e maka hanesan, iha setór agrikultura nian Governu konsege fahe tratór  ba grupu agrikultór sira, kria polítika fila rai gratuita, fahe fini, reforsa kapasitasaun ba povu agrikultór, instala estensionista iha fatin hotu-hotu hodi fó apoia téknika ba grupu agrikultór.

Nune’e mós, iha setór peska nian fó apoia tékniku ba grupu peskadór sira no kria polítika harii fatin ba leilaun ikan ka Lotas de Pescas (tempat pelelangan ikan).

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here