Diretora FOKUPERS, Maria Jose Guterres. Imajen/ TATOLI

DILI,04 dezembru 2019 (TATOLI)-Kongregasaun Societas Verbi Divini (SVD) hosi Roma tuir planu sei estabelese akordu ida atu servisu hamutuk ho Organizasaun Forum Feto Timor-Leste(FOKUPERS) hodi fó asisténsia ba labarik minoridade ba kazu abuzu Seksuál.

Diretóra FOKUPERS, Maria José Guterres hato’o asuntu ne’e, hafoin hala’o enkontru ho Prokuradór Jerál Kongregasaun SVD Roma, Padre. Peter Dikos, iha salaun enkontru FOKUPERS

“Ohin sorumutu faze primeiru ne’e,  atu hametin liután parseria hodi haree ba kazu abuzu Seksuál iha Timor-Leste,”dehan,Diretóra Ezekutivu FOKUPERS ohin.

Nia sente onradu ho  prezensa  Padre SVD ne’e tanba bele hametin kooperasaun servisu  ho organizasaun feto Timor-Leste ne’e hodi proteze  feto sira-nia diretu.

Violasaun hasoru feto hanesan krime públiku ida tanba ne’e, Diretóra ne’e, hateten entidade hotu-hotu inklui igreja mós iha papel atu kontribui hodi prevene no kombate.

Entretantu, tuir planu Prokuradór Jerál kongregasaun SVD Roma,  Padre Peter Dikos, durante ninia estadia semana ida iha Timor-Leste sei hasoru malu ho Ministra Edukasaun Juventude no Desportu, Dulce de Jesus, Vise Ministra Solidariedade Sosiál no Inkluzaun,  Signi Candrawati Verdial, Bispo Dioseze Dili,Don Virgílio do Carmo da Silva  no seluk tan.

Jornalista :Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here