Diretór Edukasaun Munísipiu Manatuto, Eduardo Guterres. Imajen Tatoli/Joanico de Araújo

MANATUTO, 04 dezembru 2019 (TATOLI) – Diretór Edukasaun Munísipiu Manatuto, Eduardo Guterres, hateten kondisaun edifísiu no fasilidade eskola iha Manatuto sei ho kondisaun mínimu, tanba ne’e presiza hadi’a.

“Kondisaun eskola iha Manatuto ha’u labele dehan buat hotu di’ak ka buat hotu a’at, maibé ha’u só bele dehan de’it kondisaun eskola iha Manatuto sei mínimu hela ein termu kualidade edifísiu no fasilidade”, tenik Diretór ne’e ba Agência Tatoli, kuarta ne’e.

Kona-ba kualidade edifísiu, nia haktuir, iha eskola barak mak uluk hetan ajuda mai hosi Noruega atu halo eskola hamutuk 15, maibé meia parede de’it entaun agora kondisaun didin sira ne’e komesa a’at daudaun.

Nia dehan, maski kondisaun eskola sira ne’e a’at maibé sei bele mantein hela hodi hala’o prosesu aprendizajen.

Diretór ne’e refere oituan kona-ba fasilidade sala aula ne’ebé iha mós ligasaun maka’as ho númeru profesór sira.

“Ita haree iha eskola balun maski ninia klase to’o ona kuartu no kintu anu, maibé eskola ne’e bele iha profesór ida ka rua de’it ne’ebé bele hanorin to’o sala haat ka lima. Entaun nia problema maka’as mak falta profesór,” nia dehan.

“Sala aula ne’e iha eskola ne’ebé mak númeru alunu barak iha kada sala ida, ne’ebé alunu bele to’o 50 mak tama iha laran. Nia problema kona-ba alunu 50 tama lisuk iha sala laran ne’e tanba profesór la to’o no falta sala aula”, nia akresenta.

Tuir Eduardo Guterres, iha duni mínimu kondisaun maibé tanba parte edukasaun munisipál no eskola sira bele jere sala aula ba ida-idak ninia hodi bele halo ensinu aprendizajen entaun fahe ba etapa rua.

“Dalan seluk ida maka bainhira alunu barak liu, balun bele aprende iha dader no balun iha parte lorokraik, ida ne’e kona-ba eskola públika ninian”, Diretór ne’e salienta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here