Sesaun plenária Parlamentu Nasionál. Imajen/TATOLI

DILI, 04 dezembru 2019 (TATOLI)—Bankada Parlamentár Frente Revolucionária Timor-Leste Independente (FRETILIN) husu halakon pagamentu pensaun vitalísia, maibé Congresso Nacional da Reconstrução de Timor (CNRT) konsidera pensaun ne’e direitu adkiridu ba eis titulár ne’ebé fó kontribuisaun ona ba Estadu ida-ne’e.

Deputadu FRETILIN, Fabião de Oliveira, lamenta ho promesa Aliansa Mudansa ba Progresu (AMP) ne’ebé antes ne’e dehan katak bainhira kaer ukun halakon Lei Pensaun Vitalísia, maibé pratikamente la akontese.

“Agora sira mak fila-fali dehan katak pensaun vitalísia la’o nafatin. Bankada FRETILIN apoia totalmente se hakarak halakon pensaun vitalísia. Sira rasik mak ko’alia atu halakon no sira rasik mak ko’alia atu mantein. Ba ami, laiha problema”, deputadu Fabião de Oliveira, ko’alia iha resintu Parlamentu Nasionál, kuarta ne’e, hafoin VIII Governu prevee millaun $6 iha proposta orsamentu jerál Estadu (OJE) 2020 liuhosi verba Transferénsia Públika.

Nia afirma, se AMP sente maioria iha Parlamentu Nasionál bele aprezenta proposta alterasaun hodi halakon lei refere.

Lee mós: Governu Prevee Millaun $6 Ba Pagamentu Pensaun Vitalísia

“Sira (bankada Governu) bele halo proposta alterasaun, maibé agora sala sé nian. Ne’e AMP nia sala. La’ós FRETILIN nia sala”, nia afirma.

Fabião rekoñese katak lei ne’e prodús iha tempu governasaun dahuluk, maibé hakarak halakon bankada Governu nian tenke hato’o proposta alterasaun urjente, nune’e kumpre promesa AMP nian.

Maibé, Deputadu Bankada CNRT, Patrocínio Fernandes dos Reis, subliña kuandu lei ne’e sei vigora, eis titulár sira ne’ebé benefísia hosi lei ne’e la’o nafatin.

“Lei Pensaun Vitalísia ne’e direitu adkiridu. Ne’e duni, Governu iha obrigasaun atu nafatin tau osan sustenta durante lei ne’e seidauk alterada. Kualkér Governu iha devér kumpre lei ne’e”, Patrocínio tenik.

Lee mós: Governu Planeia Reforma Lei Pensaun Vitalisia

Deputadu CNRT ne’e fundamenta, pensaun vitalísia ne’e benefísia timoroan sira-ne’ebé kontribui ona ba rai ida-ne’e dezde governasaun dahuluk to’o oras ne’e.

Nia hatutan, atu kumpre promesa hodi halo alterasaun la’ós fasil tanba presiza estuda vantajen no dezvantajen, liuliu implikasaun pozitivu no negativu ba Estadu.

Entretantu, deputadu Bankada Kmanek Haburas Unidade Nasionál Timor Oan (KHUNTO), António Nobre, akreseneta enkuantu lei ne’e seidauk revoga pensaun la’o nafatin tanba bazeia ba lei.

“Ba KHUNTO, atu halakon pensaun vitalísia mós laiha buat ida tanba ita iha seguransa sosiál hodi asegura ita”, nia haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here