Prezidente Veteranu Soibada, Agripino Sarmento 'Coisiri'. Imajen/Joanico de Araújo

MANATUTO, 03 dezembru 2019 (TATOLI) – Prezidente Veteranu Soibada, Agripino Sarmento ‘Coisiri’, husu ba Governu atu realiza inisiativa atu loke Banku Veteranu hodi sira bele rai osan no organiza-aan ba futuru, nune’e bele tau matan ba família sira.

“Ami hotu simu osan veteranu nian. Ami simu tiha hotu ida-idak hela iha ninia uma no la hatene loos sé maka atu organiza. Ita simu osan bele gasta tuir ita nia hakarak tanba lahatene atu halo saida”, dehan Coisiri ba Agência Tatoli, tersa ne’e.

Veteranu ne’e haktuir, inisiativa atu harii banku ne’e mai hosi Sekretáriu Estadu ba Asuntu Kombatente Libertasaun Nasionál, Gil da Costa ‘Oan Soru’ bainhira halo diálogu ho veteranu sira iha Munisípiu Manatuto.

“Ami apresia tebes iniasiativa Sekretáriu Estadu Oan Soru, ne’ebé mai ko’alia kona-ba Banku Veteranu hanesan programa ida. Ida ne’e importante tanba atu haree oinsá veteranu sira organiza sira ninia finanseiru ba futuru. Tanba ne’e, bainhira realiza lalais di’ak”, nia akresenta.

Coisiri observa, durante ne’e veteranu balun haruka ninia oan sira ba eskola, halo uma no seluk tan, maibé veteranu balun labele jere osan ho di’ak.

“Sé ita simu tiha pensaun veteranu nian maka ita la’o mesak sein regra ne’e susar. Di’ak liu iha banku ida no tau kedan regra ruma nune’e aban bain-rua bele gasta osan maibé ho kuidadu”, nia subliña.

Biban ne’e, nia mós husu ba Governu atu harii lalais Konsellu Veteranu atu bele tau matan ba veteranu sira.

“Konsellu ne’e tenke harii lalais tiha atu ita bele  tau matan ba veteranu. Bainhira konsellu seidauk harii, veteranu namkari to’o loron boot ruma hanesan 20 maiu no 28 novembru ita buka veteranu sira la hetan. Lolos ne’e loron boot rua ne’e ita veteranu mak harii, ne’ebé ita tenke hatene-aan atu ba bolu ema la’ós hein fali konvite mak foin bá”, nia dehan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here