Defisiénsia sira hatudu kreatividade liu hosi obra artezenatu ne'ebé sira produs durante iha feira iha komemorasaun loron mundiál ba ema ho defisiensia iha sentru konvensaun dili. Imajen/ Nelson Sousa

DILI, 03 Dezembru 2019 (TATOLI)-Timor-Leste liuhosi Assosiasaun Defisiénsia Timor-Leste (ADTL) komemora loron mundíal ba ema defisiénsia ho tema “Mai ita garante inkluzividade no igualidade ba ema ho defisiénsia” Hodi dignifika direitu ema ho defisiénsia, liuliu atu promove no proteje direitu ema ho defisiénsia nian.

Primeiru Ministru, Taur Matan Ruak.Imajen/Antonio Goncalves

Iha Komemorasaun loron mundíal ba ema ho defisiénsia iha TL ne’e,  Primeiru-Ministru Taur Matan Ruak iha nia mensajen hateten, governu halo esforsu hodi responde ba partisipasaun ema ho defisiénsia ne’ebé sira hasoru iha moris lorloron.

“Timor-Leste iha kompremisiu bo’ot hodi tau ema nu´udar sentru iha dezenvolvimentu nasionál ne’ebé hatuur iha planu estratéjiku dezenvolvimentu nasionáll 2030, governu  halo ona esforsu hodi responde partisipasaun sira ne’ebé ema ho defisiénsia hasoru iha moris loron-loron,” hateten primeiru-Ministru Iha Sentru Konvensaun Dili (CCD, sigla portugés), tersa ne´e.

Notísia relevante:ADTL Husu Ba Governu Atu Ratifika Konvensaun Direitu EHD

Iha biban hanesan, xefe governu apela atu públiku bele apoiu serbisu hosi organizasaun ema ho defisiénsia iha TL kria kondisaun asesivel no iklui ema ho defisiénsia iha prosesu dezenvolvimentu nasionál hodi bele atinje objetivu atu la husik ema ida iha kotuk.

“Timor-Leste mós hola parte iha Objetivu Dezenvolvimentu Sustentavel ba 2030 ne’ebé dehan la husik ema ida iha kotuk. Atu ko´alia kona-ba futuru ida ne’ebé asesibel no ekuál. Ha´u apela ba públiku atu apoiu serbisu sira hosi organizasaun ema ho defisiénsia iha Timor-Leste liuhosi fó oportunidade ba sira no kria kondisaun ida asesibel no inklui sira iha prosesu dezenvolvimentu nasionál hodi atinje objetivu atu la husik hela ema ida iha kotu,.” apela Primeiru-Ministru Tauk Matan Ruak .

Nune’e Primeiru-Ministru Taur Matan Ruak fó hanoin ba públiku atu valoriza no respeitu ema ho defisiénte.

“Presiza uza linguajen ida ne’ebé valoriz no respeitu ema ho defisiénte, nune’e igualidade no inkluzaun loloos ita tenke hatudu iha prátika respeitu no valoriza malu, la haree ba kondisaun fizíka no mentál ka relijiaun, etnia, rasa no seluk tan,” dehan xefe governu.

Enkuantu, Diretór Ezekutiva ADTL, Cesario da Silva hateten, liuhosi tema komemorasaun ida ne’e hodi hafanu sidadaun hotu atu refleta katak dezenvolvimentu iha TL sei implika nafatin partisipasaun ema ho defisiénsia.

“Iha komemorasaun ida ohin nian iha subtema rua maka hanesan proteje feto ho defisiénsia  no futuru dezenvolvimentu Timor-Leste ne’ebé asesivel tanba tema rua ne’e hodi hafanu ita hotu hodi refleta ba dezenvolvimentu iha ita-nia rai.  Atu hateten katak dezenvolvimentu iha ita-nia rai sei implika nafatin partisipasaun  ema ho defisiénsia, liuliu atu responde ba partisipasaun ema ho defisiénsia, ativu hanesan daudaun ho ema sira seluk, ne’ebé ema ho defisiénsia sei hasoru  barreira boot.” hateten Diretór Ezekutivu ne’e iha nia diskursu.

Diretór ADTL ne’e mós husu atu sidadaun hotu tau ba asaun pratíka inkluzaun no igualidade ba ema ho defisiénsia.

Selebrasaun  loron mundiál tinan ida ne’e, ita hotu atu ko´alia kona-ba dezenvolvimentu  ida ne’ebé inkluzivu, igualidade ba ema hotu.

Iha Konstituisaun RDTL artigu 16 kona-ba universalidade no igualidade sidadaun defisiénsia nune’e mós iha artigu 21 espesífika liu kona-ba  sidadaun defisiénsia, refleta situasaun sira ne’e hafanu ita nafatin  atu koali’a nafatin ba inkluzaun, igualidade, tenke tau ba asaun pratika.

“Ida ne’e maka ita hotu hakarak husu atu entidade hotu bele kontribui  ba asuntu dezenvolvimentu ema ho defisiénsia, nune’e tenke inklui ema ho defisiénsia hotu hia ita idaidak nia programa, sensibiliza ba família no komunidade kona-ba asuntu defisiénsia.” Diretór Ezekutivu ADTL, Cesario da Silva salienta.

Notísia relevante:Presiza Inklui Sidadaun Ho Defisiénsia Iha Prosesu Dezenvolvimentu  

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here