Sekretáriu Estadu ba Formasaun Profisionál no Empregu Julião da Silva.Imajen/Antonio Goncalves

DILI, 03 dezembru 2019 (TATOLI) – Sekretáriu Estadu Formasaun Profisionál no Empregu (SEFOPE), Julião Da Silva, hatete iha tempu badak, SEFOPE sei asina akordu ho Governu Japaun hodi bele simu timoroan atu bá servisu.

“Agora, ita hein de’it Governu Japaun atu halo aseitasaun hodi ita bá asina ona akordu iha tempu besik hodi bele simu ita-nia traballadór”, SEFOPE Julião da Silva ba TATOLI, iha Parlamentu Nasionál, ohin.

Julião dehan Governu iha esperansa boot atu asina akordu entre nasaun rua iha semana rua mai tan hodi bele fó dalan atu iha 2020 ekipa téknika sira bele halo ona servisu.

“Ita asina akordu para programa auto empregu ne’e ba iha setór otelaria ka elétrika ka karpinteiru para ita mós hahú formasaun”, katak.

Nia dehan ba programa ne’e, SEFOPE mós propoin ona orsamentu millaun $1-resin atubele halo estabelesimentu sistema formasaun ba lian Japaun nian ba timoroan sira ne’ebé hakarak bá serbisu iha nasaun refere.

Entretantu, daudaun ne’e timoroan kuaze 6000 mak bá ona serbisu iha Koreia no Austrália no Governu liuhusi SEFOPE mós halo ona kontaktu ho Governu Irlanda atubele simu timoroan bá serbisu iha nasaun refere.

Iha ámbitu diskusaun Orsamentu Jerál Estadu (OJE) 2020 iha jeneralidade, Primeiru Ministru Taur Matan Ruak dehan Governu ne’e fó onra ba ninia kompromisu ne’ebé firme atu kontinua serbisu hodi hamenus taxa dezempregu liuhusi investimentu ne’ebé propoin ona iha OJE nian ba edukasaun, formasaun, kapasitasaun, abilitasaun téknika no profisionál ba rekursu umanu timoroan sira.

Investimentu sira-ne’ebé Governu propoin atu hala’o liuhusi OJE nian no reforsu orsamentál ba Fundu Dezenvolvimentu Kapitál Umanu (FDCH).

“Sei tulun ita-nia maundobra nasionál hodi hatán ba ezijénsia kona-ba kompeténsia no exelénsia nian ne’ebé merkadu traballu ezije ba traballadór sira hotu, ida ne’e sei ajuda kontribui atu atinje meta ambisioza atu kria serbisu foun 60.000 iha prazu badak nia laran”, afirma.

Governu iha konsiénsia katak sei la fásil atu alkansa objetivu ambisiozu sira ne’e hotu, ne’ebé propoin iha tinan ida de’it nia laran.

“Maibé ha’u bele asegura ba ita-boot sira katak ami-nia firme intensaun mak atu mantén liuhusi hamutuk ho espíritu kooperasaun institusionál ida leál no ho respeitu tomak ba responsabilidade konstitusionál husi ema hotu nian, ita bele alkansa meta ne’ebé prevee iha programa Governu, to’o iha atuál lejizlatura ne’e nia rohan”, garante.

Notísia relevante : Japaun Interese Simu Traballadór Timoroan

Governu Japaun Responde Pozitivu Simu Traballadór Timoroan

Jornalista : Florencio Miranda Ximenes

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here