Mega projetu Estádiu Munisipál Manatuto. Imajen Tatoli/Joanico de Araújo

MANATUTO, 03 dezembru 2019 (TATOLI) – Traballadór hosi kompañia lokál Obrai Unipesoal, Lda ne’ebé kaer konstrusaun Estádiu Munisipál Manatuto, kuaze tinan rua la selu traballadór ne’ebé tau matan ba estádiu.

Traballadór Kompañia Obrai iha Estádiu Manatuto, Vicente Soares, ne’ebé durante ne’e tau matan, informa kada fulan kompañia tenke fó ba sira saláriu $150, maibé to’o agora seidauk halo pagamentu, hahú hosi estádiu ne’e harii to’o ohin loron.

Traballadór Kompañia Obrai iha Estádiu Manatuto, Vicente Soares. Imajen/Joanico de Araújo

“Kompañia la selu ami to’o agora. Sira mai dehan osan sai mak foin selu maibé to’o agora la selu ami durante fulan 23 ona,” dehan Vicente ba Agência Tatoli iha Estádiu Munisipál Manatuto, tersa ne’e.

Notísia Relevante: Estádiu Manatuto-Dili Paradu, Gleno La’o Di’ak

Nia dehan, kada loron sira nia servisu mak tau matan ba estádiu atu ema labele book no foti sasan sira ne’ebé kompañia tau iha ne’ebá.

“Ami nia servisu iha ne’e mak tau matan ba fatin ida ne’e. Haree ema labele sobu vidru sira no karau labele haan duut sira, maibé realidade kompañia la mai haree ami. Foin horseik mak sira mai mais ko’alia de’it dehan ami tenke servisu nafatin, kuandu ami nia família sira presiza osan husu mós sira dehan de’it osan laiha”, nia lamenta.

Estádiu Munisipál Manatuto, ne’ebé agora daudaun ninia obra paradu. Imajen/Joanico de Araújo

Iha traballadór barak husi munisípiu oioin mak tau matan ba estádiu ne’e.

“Ami barak mak servisu iha ne’e. La’ós ha’u mesak de’it. Traballadór sira balun hosi munisípiu Ermera, Aileu, Liquiça no Manatuto rasik. Ami hotu seidauk simu ami nia osan”, traballadór ne’e salienta.

Projetu konstrusaun Estádiu Manatuto ho naran “Kay Rala Xanana Gusmão”, implementa hosi Kompañia Obrai Unipesoal Lda ho valór orsamentu millaun $2 no Governu selu ona pursentu 60.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here