Ekipa konjunta KFP, KAK, IJE halo inspesaun ba Diresaun Nasionál Transporte no Terrestres (DNTT) Balide ho Comoro, foin lalais ne'e. Imajen/Espesiál

DILI, 03 dezembru 2019(TATOLI)-Komisaun Funsaun Públika (CFP-sigla Portugés) iha ona planu importante rua atu hahú  implementa iha inísiu 2020 hanesan  vizita surpreza ba instituisaun estadu sira no operasaun hasoru viatura estadu ne’ebé sirkula iha loron feriadu.

Notísia Relevante : KAK, IJE, PDHJ ho KFP Buka Tuir Indísiu KKN Rekrutamentu Traballadór iha SEFOPE

Komisáriu Komisaun Funsaun Públika ba asuntu Disiplinár, António Freitas, hateten, implementasaun programa rua ne’e ho objetivu atu garante governasaun di’ak ba servisu administrasaun públika no mós prevene uza sala karreta no motor Estadu ba interese pesoál.

Notísia Relevante : KFP, KAK, PDHJ ho IJE Koopera Malu ba Asegura Governasaun Di’ak iha Instituisaun Estadu

Nia dehan, KFP daudaun ne’e renova ona  nota entendimentu  foun (MoU-sigla Inglés) ho instituisaun Estadu hanesan Polisia Nasionál Timor –Leste(PNTL), Komisaun Anti Korrupsaun (CAC-sigla portugés), Inspetór Jerál Estadu (IJE), Diresaun Nasionál Transporte no Terrestre (DNTT) hodi halo operasaun  ba viatura Estadu ne’ebé maka sirkula  iha loron feriadu.

KFP  estabelese mós akordu ho Komisaun Anti Korrupsaun, Provedoria Diretu Umanu no Justisa (PDHJ-sigla Portugés) no Inspetór Jerál Estadu hodi hala’o vizita surpreza ba instituisaun Estadu sira hodi haree funsionamentu servisu administrasaun públika ba garante governasaun di’ak.

Notísia Relevante : Operasaun Konjunta “Prende” Viatura Estadu 60

 “Ha’u hatene instituisaun balun funsionáriu tama tuku 9:00  no tuku 10:00 no ita sei vizita mós ba instituisaun públiku sira ne’ebé fó kontribuisaun reseita ba kofre Estadu,” Komisáriu António Freitas, informa ba TATOLI, foin lalais ne’e, iha ninia servisu fatin, Matadoru, Dili.

KFP identifika ona instituisaun sira ne’ebé maka sei sai alvu ba vizita surpreza ne’e  iha tinan oin, maibé Komisáriu ne’e seidauk bele públika ba públiku tanba kuidadu segredu servisu instituisaun.

Notísia Relevante : Operasaun Konjunta Ba Viatura Estadu Ho Intensaun Diminui Despeza

Antes ne’e,  ekipa konjunta hala’o ona vizita surpreza ba SEFOPE, Ministériu Finansa, Alfándega iha Munisípiu Dili no Bobonaro.

Hosi vizita ne’e, ekipa konjunta halo ona  rekomendasaun ba ministériu no instituisaun atu hadi’a no kazu ne’ebé liga ho korrupsaun rekomenda ba Komisaun Anti Korrupsaun no Ministériu Públiku atu halo investigasaun.

Notísia Relevante : Operasaun Konjunta Entrega Ona Relatóriu Finál ba KFP

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here