Diretóra Jéral Asuntu ASEAN Ministériu Negósius Estranjeirus no Kooperasaun (MNEK), Milena Rangel. Imajen/Tatoli

DILI, 03 dezembru 2019 (TATOLI)– Ministériu Negosiu Estranjeiru no Kooperasaun liuhusi Institutu Estudu Diplomátiku (IED) realiza semináriu trilaterál entre Timor-Leste, Indonézia no Korea Sul, hodi partilla koñesimentu no esperiénsia iha área ekonomia, atu nune´e Timor-Leste (TL) bele prepara aan di´ak liután bainhira hola parte iha organizasaun Sudezte Aziátika (ASEAN, sigla inglés).

Diretora Jerál Asuntu ASEAN, Milena Rangel hateten, iha semináriu trilaterál entre Timor-Leste, Korea no Indonézia ko’alia liu kona-ba pilár ekonomia.

“Ita iha peritu ida mai husi Indonézia sai hanesan oradór no ida mai husi Korea iha sira-nia rai sira hanesan negosiadór ba komersiu. Sira partilha sira-nia esperensia kona-ba oinsá ita bele iha oportunidade di’ak bainhira ita tama ona ASEAN,” hateten Diretora Milena Rangel, iha Edifísiu MNEK, Praia dos Coqueiros, Dili, ohin.

“Sira loke prespetiva oioin kona-ba Timor-Leste nian envolvimentu aban bainrua, haree hela oportunidade balun aban bainrua keta ita tama ona ASEAN karik saida mak ita bele halo,”  dehan Diretora Milena Rangel.

Nia hatutan, Korea Sul hanesan parseiru dialógu ASEAN nian ne´ebé mak halo atividade komérsiu estadu membru ASEAN sira nian.

Em princípio atu loke oinsá ita-nia atividade aban bainrua atu responde loloos pilar ekonomia ho nesesidade saida nak iha ASEAN bele oferese mai Timor-Leste hodi faz parte iha ASEAN. Husi Timor-Leste prepara ona ka lae kona-ba parte ekonomia nian.

Nia haktuir, iha dader ita iha enkontru ida ho liña ministeriál sira, mai husi ministériu relevante  korresponde ba atividade ekonomia ni’an, iha ne’ebá grupu tékniku sira ko’alia ho oradór husi Korea ni’an oinsá atu haree Free Trade agreement ne’ebé Korea iha.

“Oinsá ita bele hare’e asuntu sira ne’e ba aban bainrua karik ita iha ona oportunidade atu elabora liután no sira fó esplikasaun ba ita para oinsa atu intende loloos dinamiku komérsiu nian iha ASEAN ni’an laran no mós hamutuk ho parseiru dialogu sira,” katak Diretora Milena Rangel.

Iha fatin hanesan, Koordenadór Estudu Diplomátiku, MNEK, Aurélio Cristovão Guterrres hakutir katak iha semináriu trilaterál ne´e diskute asuntu oioin kona-ba ekonomia liuliu oinsá Timor-Leste bele uza ninia rekursu rasik iha rai laran atu dezenvolve nia ekonomia.

Timor-Leste atu dezenvolve nia aan, ninia ekonomia presiza nia valór rasik no labele kopiatuir valór usi rai li´ur.

“Profesór Parhimpunan Simatupang husi indonézia hateten, iha 2018 bainhira sira enfrenta krize ekonomika, ne’e hanesan ezemplu ida ba sira, tanba  baze ekonomia Indonézia nian mak agrikultura. Agora, ita Timór mós ita-nia baze saida? Ita-nia baze ekonomia, agrikultura ita presiza. Hanesan péritu hateten, ita presiza haree took define loloos ita-nia baze ekonomia saida ne’e para ita bele dezenvolve ita-nia rai didiak liuliu iha parte ekonomia nian enkuantu ita depende ba ekonomia petrolíferu; gás no petróleo”.

“Agora ba oin tenkeser, ita espera ita-nia politíka dezenvolvimentu nasionál bele tau atensaun uitoan ba parte ida ne’e,tanba ida ne’e sai hanesan ita-nia baze ekonomia”.

Koordenadór Jerál ba Institutu Estudu Diplomata, Aurelio Guterres haktuir, semináriu ne’e matéria ne’ebé profesór Parhimpunan Simatupang husi indonézia ni’an ko’alia liga mós ekonomia ASEAN ni’an enjerál no nasaun ASEAN nian tomak inkluzivamente kona-ba investimentu.

Timor ba oin presiza investimentu ida boot husi rai li´ur, oinsá ita dada investimentu mai rai laran, liuliu oinsá bele ajuda para responde ba kampu traballu iha rai laran tanba dezempregu mós hanesan problema bo’ot ida iha ita-nia rain.

Liuliu investimentu ne’ebé liga ho nasaun boot sira ne’ebé durante foin halo investimentu ba iha nasaun ASEAN sira inklui mós Indonézia investimentu mai husi Xina, mai husi  Japaun, mai husi Estadus Unidu Amérika (EUA). Ba oin, Timór bele hanoin oinsá bele dada investimentu boot sira mai, bele ajuda mós responde ba kestaun loke kampu traballu.

“Iha ita-nia rai mós ita bele dehan katak joven barak kampu traballu sei sai hanesan dezafiu boot ida ba ita,” nia konsidera.

Entertantu, husi Korea  reprezenta profesór emeritus, ekonomia iha Seoul, husi Universidade Nasionál Korea, LEE Seunghoon no Indonézia reprezenta profesór Ekonomia ba Suísa n no Alemaña, Parhimpunan Simatupang hodi fahe esperiénsia kona-ba pilar ekonomia ba Timor-Leste.

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here