Xefe Bankada FRETILIN no PPN eleitu, Aniceto Guteres. Imajen Tatoli/António Gonçalves

DILI, 03 dezembru 2019 (TATOLI)–Durante intervensaun iha debate loron daruak orsamentu jerál Estadu (OJE) 2020, ohin, iha plenária Parlamentu Nasionál, Prezidente Bankada FRETILIN, Aniceto Guterres husu Governu atu halo diagnóstiku loloos ba problema hotu ne’ebé iha, identifika dezafiu sira, hafoin bele define polítika no prioridade ba rai ida-ne’e.

“Tempu to’o ona atu halo diagnóstiku loloos ba problema sira-ne’e no identifika dezafiu sira iha ita-nia oin, hafoin define ita-nia polítika no prioridade. Se lae, tinan-tinan ita lori númeru sira bosok malu hela de’it, maibé nunka rezolve problema loloos. Ita marka pasu hela iha fatin no halo ita dook tan de’it atu alkansa ita-nia mehi ka objetivu ne’ebé define tiha ona”, Aniceto husu.

Nia esplika, atu haburas ekonomia, relevante duni atu la’o tuir Objetivu Dezenvolvimentu Sustentável (ODS) nian hanesan halakon pobreza, saúde no povu-nia moris di’ak, kualidade edukasaun, hasa’e númeru kampu serbisu no kreximentu ekonomia.

Maibé, nia hatutan, Timor-Leste sei hasoru problema barak, mak hanesan problema produsaun, problema empregu no seluk tan ne’ebé balun estruturante tebes.

Dadus ne’ebé FRETILIN iha hatudu katak dezde tinan 2013, empregu la sa’e maibé tun, ho tendénsia sei tun tan. Aleinde ne’e, taxa dezempregu aumenta, tanba fatór produsaun (ema, rai no kapitál), osan ne’ebé Governu gasta la prodús buat ruma, timoroan sira laiha skill, la kriativu no laiha kapitál.

Aniceto mós dehan, despeza públika husi orsamentu Estadu ne’ebé tinan-tinan halo ona, hamosu de’it empregu temporáriu no uitoan liu.

“Ita haree ita-nia balansa komersiál permanentemente defisit, tanba esportasaun ki’ik-oan liu. Ne’e tanba fraku duni iha produsaun iha rai-laran, ne’ebé ikus mai aumenta tan dezempregu. Investimentu privadu atu kria kampu serbisu mukit loos. Ita laiha kondisaun natón atu atrai investimentu privadu husi rai-li’ur. Hetok risku ba investimentu iha Timor-Leste boot liu. Ne’e tanba kualidade rekursu umanu ladi’ak ne’ebé hatudu husi Timor-Leste nia índise dezenvolvimentu umanu, Timor-Leste iha de’it %0,43, menus liu iha Rejiaun Sudeste Aziátiku”, nia esplika tan.

Prezidente bankada FRETILIN ne’e haklaken, problema efetividade judisiál, saúde fiskál ne’ebé hatudu husi índise liberdade ekonómika, ne’ebé Timor-Leste sei iha kategoria ekonomia reprimidu; Problema atrasaun investimentu hanesan Doing Bisnis husi Banku Mundiál, ne’ebé Timor-Leste sei nafatin iha pozisaun 178 husi nasaun 190.

Tuir dadus 2018 nian ne’ebé aprezenta husi bankada FRETILIN katak Timor-Leste (TL) nia pozisaun iha mundu iha 149 husi nasaun 192, tanba nia gross national income, rendimentu perkapita ki’ik-oan, menus husi $200.

“Ita sei iha klasifikasaun rendimentu baixu $995 ka menus. Enkuantu, klasifikasaun rendimentu altu-médiu ne’ebé ita hakarak atinje tuir PED, ne’e mak $3,956 – $12,235. Konserteza Timor-Leste sei la konsege alkansa rendimentu altu-médiu iha 2030. Bainhira ema balun dehan bele alkansa, ne’e nia moris iha iluzaun karik”, Aniceto haktuir.

Tanba ne’e, nia husu tan katak Governu tenke haree orsamentu ne’ebé gasta tiha ona ba Timor-Leste durante tinan sanulu resin-rua Aliansa Maioria Parlamentár (AMP) nia ukun, besik biliaun $14.

Husi lansamentu Planu Estratéjiku Dezenvolvimentu (PED) iha 2011, nia informa, mai to’o 2019 totál orsamentu aprovadu iha Parlamentu Nasionál durante tinan 8, iha ona biliaun $12.6, rezultadu atinje ka lae.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here