Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

DILI, 03 dezembru 2019 (TATOLI)—Bankada Parlamentár Frente Revolusionária Timor-Leste Independente (FRETILIN), deputadu Joaquim dos Santos, hateten Governu hakarak foti liu Rendimentu Sustentável Estimadu (RSE) tenke investe ba setór produtivu.

“Ita kuandu foti RSE tenke investe ba iha setór produtivu sira hanesan edukasaun, saúde no agrikultura. Se maioria autoriza foti osan ne’e ami sei lori ba Tribunál, tanba orsamentu ne’e viola prinsípiu konstitusionál ne’ebé garantia kona-ba ita-nia seguransa fundu obrigatóriu”, nia dehan ba Agência TATOLI, iha Parlamentu Nasionál, tersa ne’e.

Deputadu Bankada Opozisaun ne’e hateten, Governu foti liu pursentu tolu ne’e la tuir Lei Petrolífera no gasta de’it laiha retornu.

“Lei autoriza bele foti. Primeiru, tenke iha kondisaun esplika mai Parlamentu foti liu %3 ne’e atu halo saida, tenke agrega. Infelizmente, Governu haruka de’it karta mai Parlamentu katak foti osan liu %3 tau iha bens servisu. Ha’u hanesan deputadu la konkorda ho argumentu ne’ebé la razoável ne’e. Ne’e bele iha dezviu orsamentu. Bele mós dezkontrolu. Osan bele lakon hotu”, nia argumenta.

Joaquim haktuir katak FRETILIN prepara ona proposta barak hodi husu orsamentu ne’e tau iha fatin loloos no tenke prevee iha kategoria Kapitál Dezenvolvimentu.

Nia husu atu orsamentu 2020 tenke ekilibradu entre despeza ho reseita. Reseita ki’ik-oan maibé despeza ne’e tetu ba dasi todan atu mate.

“Tenke ekilibriu iha setór produtivu, tanba orsamentu ida agora ne’e ba setór sosiál, edukasaun no saúde ki’ik tebes”, nia katak.

Nia hatutan, OJE 2020 foti hosi fundu petróleu boot ba beibeik.

“Governu tenke konkorda ho opiniaun ne’e. Kuandu la konkorda, ami sei vota kontra”, deputadu Joaquim dos Santos realsa.

Tuir Lei Fundu Petrolíferu, admite Governu foti orsamentu hosi Fundu Petrolíferu ho valór pursentu 3 (%3). Signifika, foti millaun $794.3 hosi RSE. Nune’e, OJE 2020 Governu bele propoin to’o de’it biliaun $1.6. Proibe ultrapasa montante refere.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here