Ministra Finansa en-ezersísiu, Sara Lobo Brites. Imajen/TATOLI.

DILI, 03 dezembru 2019 (TATOLI) – Ministra Finansa ein funsaun, Sara Lobo Brites, relata ezekusaun Orsamentu Jerál Estadu (OJE) 2019 atinje ona porsentu 78.4 no sei iha fulan ida (dezembru) atu ezekusaun bele sa’e to’o porsentu 85.

“Tanba pagamentu fíziku barak sei akontese iha fulan ikus, entaun ami haree katak ezekusaun bele sa’e to’o entre porsentu 80-85”, katak Sara Lobo Brites iha Parlamentu Nasionál, ohin, iha ámbitu diskusaun OJE 2020 iha jeneralidade.

Tuir portál transparénsia Timor-Leste nian, OJE 2019 ho biliaun $1,482 nia ezekusaun porsentu 78.4 ho kompromisu ne’ebé hala’o hela tuir planu $126,475,031.50, obrigasaun ne’ebé atu selu ba ema ne’ebé asina ona kontratu $135,425,484.11, atuál ne’ebé gasta ona $1,025,989,186.62 no saldu ne’ebé seidauk aloka ba prosesu ruma $194,110,297.77.

Entretantu, atuál Vise-Ministra Finansa hatán sobre ezekusaun OJE tinan ne’e, relasiona ba membru Governu inkompletu, nia dehan, bainhira membru Governu kompletu maka ezekusaun di’ak liután.

“Maibé, Governu iha obrigasaun atu serbisu maka’as para bele asegura ezekusaun tanba ko’alia kona-ba ekonomia rai-laran”, katak.

Deputada Bankada FRETILIN, Maria Angélica Rangel. Imajen/Egas Cristovao.

Iha parte seluk, deputada Bankada FRETILIN, Maria Angélica Rangel, kestiona katak Governu husu osan boot iha 2020, maibé haree ba ezekusaun sei menus tebes.

Orsamentu ba tinan oin hamutuk biliaun $1,950, fahe ba kategoria saláriu no vensimentu millaun $241,271, sasán no serbisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

“Lei OJE 2020, orsamentu ne’ebé maka boot tebes iha istória Timór nian. Tanba orsamentu mai dala ida ho montante biliaun $1,950. Ne’e orsamentu ne’ebé ho kategoria sira ne’ebé laiha balansu tanba orsamentu ne’e maioria tau ba iha bens no servisu, transferénsia, katak orsamentu tama iha rekorrente katak osan ida bele dehan uang habis pake, maibé haree fali tinan kotuk kapasidade Governu nian atu halo ezekusaun orsamentu to’o horiseik porsentu 67 de’it, tanba sá Governu tau orsamentu boot liu tiha sira-nia kapasidade ezekusaun”, deputada Maria Angélica kestiona iha diskusaun OJE 2020.

Aléinde ne’e, Ministra Finansa interina, Sara Lobo Brites, informa  sobre kalendáriu orsamentál anu finanseira 2019 katak sistema pagamentu kontinua to’o loron 31 dezembru 2019.

“Ha’u hanoin tuir lei ne’e taka tinan iha 31 dezembru, maibé saida mak téknika sira dehan ne’e relasiona ho sirkulár ida hosi Ministériu Finansa katak fó prazu ba prosesu balu tanba ita-nia sistema ne’e iha prosesu ida kompromisu depois estabelese kontratu mak ba pagamentu”, dehan Sara Lobo.

Tanba ne’e, faze ida kontratu no kompromisu ne’e maka taka, maibé pagamentu kontinua to’o fulan ne’e remata.

Kona-ba pagamentu ba projetu sira, Vise-Ministra ne’e klarifika katak, projetu saida de’it maka iha tiha ona kontratu no orsamentu kontinua halo pagamentu to’o fin dezembru.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here