Prezidente Parlamentu Nasionál, Arão Noé de Jesus da Costa Amaral. Imajen/Tatoli

DILI, 03 dezembru 2019 (TATOLI)—Prezidente Parlamentu Nasionál, Arão Noé de Jesus da Costa Amaral, hateten maski Governu retira proposta orsamentu jerál Estadu (OJE) 2020 maibé Aliansa Mudansa ba Progresu (AMP) sólidu hela.

“Laiha indisiu ba AMP la sólidu. Ami sólidu hela no buat hotu la’o di’ak hela”, Prezidente Parlamentu Nasionál, informa ba jornalista sira, iha resintu Parlamentu Nasionál, ohin, hafoin VIII Governu deside retira proposta lei nú.8/V(2ª) kona-ba OJE 2020.

Maibé, Primeiru-Ministru (PM), Taur Matan Ruak, preokupa ho ambiente polítika iha Parlamentu Nasionál tanba bankada Governu ko’alia ho forsa agresivu.

Nia argumenta, iha debate orsamentu tinan fiskál hirak liubá bankada Governu sempre defende Governu, maibé tinan ida-ne’e diferente.

“Daudaun ne’e ha’u haree oin seluk. Bankada Parlamentár ne’ebé sustenta Governu ho forsa agresivu”, Xefe Governu informa.

Governu prevee proposta OJE 2020 ho montante biliaun $1.950 kompostu hosi saláriu no vensimentu millaun $241.3, sasán (bens) serbisu millaun $703.7, transferénsia públika millaun $469.8, kapitál menór millaun $53.2 no kapitál dezenvolvimentu liuhosi Fundu Konsolidadu Timor-Leste (FKTL) millaun $263.1, millaun $24.1 ba Programa Dezenvolvimentu Integradu Munisipál (PDIM) no millaun $98.0 ba projetu kapitál dezenvolvimentu seluk hosi liña ministeriál no ajénsia sira.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here