Ministru Obra Públika Salvador Eugênio Soares dos Reis Pires. Imajen Tatoli/Egas Cristovao

DILI, 03 dezembru 2019 (TATOLI) – Governu liuhusi Ministériu Obra Públika (MOP) husu konsumidór liña eletrisidade atu pasiénsia bainhira ahi mate tanba halo hela manutensaun ba sistema distribuisaun eletrisidade ne’ebé tuan ona.

“Husu konsumidór sira (iha kapitál no munisípiu sira) nia pasiénsia tomak enkuantu Governu serbisu maka’as ka esforsu hadi’a sistema distribuisaun eletrisidade”, Ministru Obra Públika Salvadór Eugénio Soares dos Reis Pires ba TATOLI, iha Parlamentu Nasionál, ohin.

Ministru dehan, antes hamate ahi hodi halo manutensaun iha área ka liña balun, Eletrisidade Timor-Leste (EDTL) fó sai avizu kedan atu kliente sira bele prepara aan molok ekipa téknika hadi’a.

Projetu reabilitasaun liña eletrisidade 22 ho 20kv iha Dili laran halo husi kompañia timoroan Anicla Unipessoal, Lda, hahú 2015 no balun foin atinje 80%, barak mak foin 20-40%. Entretantu liña neen hanesan Becora- Bidau-Cristo Rei, Surikmas-Aimutin, Arbiru, Beto seidauk tama iha pakote ne’e, 2020 EDTL planu hatama iha pakote foun ba implementasaun.

“Liña tuan dezde tempu Indonézia ho fiu molik no medida ki’ik ba karga ki’ik labele aguenta ba kreximentu konsumidór ho karga aumentu mak kauza ahi mate beibeik. No kondisaun grave liután kuandu udan monu rai depois bailoron naruk. Tanba ne’e presiza reabilita atu asegura fornesimentu eletrisidade ne’ebé mak konfiavel”, katak.

Nune’e, Ministru Salvadór dehan EDTL halo esforsu kada fin semana hodi hamate ahi liuhusi anúnsiu pájina EDTL no mídia seluk ba publika kada oras rua nia laran atu aselera reabilitasaun hirak nee. Entretantu, liña distribuisaun Media Tensaun (MT) totál naruk ho distánsia kilómetru rihun 700-resin no Baixa Tensaun (BT) naruk ho totál kilómetru millaun 1.2 iha territóriu tomak.

Entretantu tékniku EDTL ne’ebé halo atendimentu ba avaria liña distribuisaun iha de’it 335. Tuir padraun ema ida atende de’it kilómetru 10. Figura agora la favoravel tanba ema ida atende kilómetru 2000-resin. Tanba ne’e, 2020 EDTL planeia rekruta tan funsionáriu kazuál hodi fó atendimentu ba konsumidór EDTL.

Hodi hatutan problema ida tan mak sistema manuál mak halo identifikasaun ba avaria ne’e manuál, ne’ebé susar atu deteta vizuál, maibé presiza la’o tuir liña loke ahi leno atu identifika avaria ka sirkuitu nia lokalizasaun.

“Prosesu identifikasaun ne’e halo ahi mate lakan. Novidade di’ak mak tinan 2020 EDTL prepara ona atu dijitaliza liña balun ne’ebé maka nia reabilitasaun konkluída ona”, afirma.

Dezde asume kargu iha 2018, husi totál 270 projetu on going (iha progresu) liña eletrisidade iha territóriu tomak, MOP ezekuta ona 155 no hela de’it projetu 115 inklui kontratu kompañia lokál 22 ba reabilitasaun liña eletrisidade Dili laran atu fó tempu tinan ida kontraktor sira aselera reabilitasaun. MOP sei la kontinua extende kuandu sira la konklui iha tinan ne’e.

Tuir dadus ne’e TATOLI asesu katak iha 2019 no 2020, MOP kontinua programa eletrifikasaun nasionál hodi kompleta tiha suku 77 ne’ebé seidauk hetan asesu ba eletrisidade liuhosi preparasaun dezeñu no bill of quantities (BoQ) ba suku hamutuk 33.

Tinan ida-ne’e, MOP simu no kontinua halo Projetu Eletrifikasaun Nasionál hamutuk 192, husi númeru ne’e iha biban halo hotu projetu 88 iha tinan ne’e no agora hela de’it projetu 116, ne’e inklui Dili no territóriu tomak.

Kontinua mellora ba sistema distribuisaun iha Dili liuliu reabilitasaun liña distribuisaun tuan (Indonézia nian) 22 pakote projetu ho valór kontratu hamutuk US$6.830.369.44, la’o hela no progresu atinje ona 77.4%.

Apoiu programa Dili Sidade Seguru liuhosi atividade iluminasaun estrada no dezenvolve termu de referénsia (TOR) no prosesu aprovizionamentu la’o hela ba konstrusaun sub-estasaun ida iha Tibar no ida iha Aileu no Gleno.

Selebra kontratu ba estudu viabilidade ba potensialidade dada bee husi Railaku no Gleno hodi harii barrajen ida ne’ebé prodús mós enerjia ho kapasidade instalada 50 MW.

Instalasaun ba umakain hamutuk 1.237 ho sistema painél solár ba suku rua nulu (20) no instala no troka kontadór pre-pagu hamutuk unidade 40,200 no prepara ba akizisaun kontadór pre-pagu hamutuk unidade 11,000.

Dezenvolve TOR ba introdús sistema kombustaun gás naturál ba modu produsaun enerjia no prosesu preparativu ba dezenvolvimentu enerjia renovavel (solar park) inklui iha postu administrativu Ataúro.

Prepara prosesu dijitalizasaun ou sistema SCADA no implementa iha 2020 no realiza konkursu ba fornesimentu kombustivel ba sentrál eletrisidade Hera no Betano.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here