DILI, 03 dezembru 2019 (TATOLI)-Asosiasaun Defisiénsia Timor-Leste (ADTL), ohin, selebra loron mundiál ba ema ho defisiénsia ho tema “mai ita garante inkluzividade no igualdade ba ema ho defisiénsia”.
Notísia Relevante : PN Aprova Rezolusaun Medida Protesaun ba Ema ho Defisiénsia ho Unanimidade
Iha loron 3 dezembru, tinan-tinan, hanesan loron mundiál ba ema ho defisiénsia ne’ebé proklama ona iha Assembleia Jerál Nasoins Unida (ONU) iha 1992.
Diretór Ezekutivu ADTL, Cesario da Silva, hateten, importánsia hosi komemorasaun loron mundiál ne’e atu dignifika direitu ema ho defisiénsia liu-liu promove partisipasaun iha vida moris públiku hanesan mós ho sidadaun sira seluk.
Ba komemorasaun tinan ne’e, ADTL hili tema “mai ita garante inkluzividade no igualdade ba ema ho defisiénsia”, atu hafanu entidade hotu atu haree futuru Timor-Leste ne’ebé mak inkluzivu asesivel ho igualdade hodi garante partisipasaun ema hotu-hotu nian.
“Husu ba ministériu hotu, atu tau prioridade mós ba ema ho defisiénsia hanesan mós ho prioridade sira seluk,” hateten Cesario da Silva, iha Sentru Konvensaun Dili (CCD-sigla portugés).
Iha komemorasaun ne’e prienxe ho atividade sira hanesan semináriu nasionál, limpeza jerál, feira artezanatu, promosaun talentu iha arte no kultura, dansa, teatru hosi ema ho defisiénsia.
Atividade sira ne’e hotu gasta orsamentu $17,000, kompostu hosi apoiu liu $5,000 hosi Ministériu Solidariedade Sosiál no Inkluzaun (MSSI), Governu Austrália liuhosi partnership women development $5,000, Oxfam Timor-Leste $3,000, inklui orsamentu hosi ADTL rasik.
Jornalista : Nelson de Sousa
Editór : Francisco Simões
