Primeiru-Ministru aprezenta programa Governu, liuhusi Orsamentu Jerál Estadu 2020 iha Parlamentu Nasionál. Imajen/ Egas Cristovao.

DILI, 02 dezembru 2019 (TATOLI)–Primeiru-Ministru (PM), Taur Matan Ruak, iha ninia aprezentasaun loron dahuluk debate jeneralidade orsamentu jerál Estadu (OJE) tinan 2020, ohin, hateten Governu sei foka hodi halo avaliasaun ba kualidade husi despeza ne’ebé realiza ona. 

“Tempu to’o ona atu ita labele foka tan ba kuantidade husi despeza ne’ebé órgaun no serbisu sira Administrasaun Públika nian ezekuta ona, no atu ita bele foka fali ba avaliasaun kona-ba kualidade husi despeza ne’ebé realiza ona, tanba avaliasaun ne’e bele halo de’it ho referénsia ba impaktu ki’ik ka boot, ne’ebé despeza ne’e bele fó ba ita-nia sidadaun sira-nia kualidade moris nian ka ba kreximentu husi ita-nia ekonomia”, Taur deklara iha plenária Parlamentu Nasionál.

Xefe Governu aprofunda katak ida-ne’e orsamentu foun, ba tempu foun ida, ne’ebé karateriza ho mudansa sira-ne’ebé obriga ema hotu atu halo di’ak liután planeamentu, akompañamentu, monitorizasaun no avaliasaun ba rezultadu ne’ebé alkansa ona iha kada ezersísiu orsamentál nian.

Taur informa, atu kontinua halo reforma jestaun finansa públika, ne’ebé hahú durante mandatu VI Governu Konstitusionál, Governu atuál aprezenta ba Parlamentu Nasionál proposta orsamentál ida-ne’ebé hahú implementasaun ba prosesu orsamentasaun tuir programa.

“Maski ida-ne’e la’ós buat ne’ebé ita hakarak, proposta orsamentál ne’ebé submete ba diskusaun iha Parlamentu Nasionál seidauk inklui kualker klasifikadór orsamentál tuir programa. Maibé, tranzisaun ba modelu orsamentál foun ida ezije kuidadu no evolusaun graduál ida, atu bele tau-matan ba problema hirak-ne’ebé bele mosu ne’ebé fó konsekuénsia negativa iha atividade finanseira Administrasaun Públika nian”, Taur subliña.

Maibé, ho proposta orsamentál ida-ne’e, nia hatutan, Governu no Parlamentu Nasionál fó pasu ida iha tranzisaun ba modelu orsamentasaun tuir programa, ho konsiderasaun katak teste dahuluk husi modelu ne’e inklui ona maski lahó karater imperativu, iha livru 2 ne’ebé akompaña proposta orsamentu jerál Estadu nian liuhusi inkluzaun programa orsamentál sira.

Xefe Governu hatutan, alterasaun paradigma iha matéria modelu orsamentál nian buka valoriza rezultadu sira, objetivu sira ne’ebé atu atinje, envezde dimensaun husi rekursu ne’ebé disponibiliza arbiru, no hatama iha envelope fiskál institusionál, ho forma simples rúbrika ka kategoria orsamentál nian.

Nia haklaken, aprovasaun proposta orsamentu jerál Estadu ba tinan 2020 sei reprezenta pasu ida tan iha dalan atu moderniza jestaun finansa públika nian, hodi estabelese ligasaun direta ida entre planeamentu estratéjiku ba tempu naruk no planeamentu ba tempu badak, ne’ebé fahe ba programa ezekusaun anuál 137 (atus ida tolunulu-resin-hitu), ne’ebé tuir fahe tan ba sub programa 482 (atus haat ualunulu-resin-rua) no atividade 1,957 (rihun ida atus sia-limanulu-resin hitu).

“Ezersísiu ida-ne’e sei abranje entidade públika (ministériu, organizasaun no ajénsia autónoma) 86 (ualu-nulu-resin-neen) ne’ebé integra iha universu Estadu nian, entidade sira-ne’e asume responsabilidade importante iha implementasaun no avaliasaun dezempeñu husi projetu sosiál hamutuk 29 (ruanulu-resin-sia), projetu ekonómiku 23 (ruanulu-resin-tolu), projetu kona-ba infraestrutura hamutuk 44 (haatnulu-resin-haat) no projetu husi natureza Institusionál hamutuk 41 (haatnulu-resin-ida)”, Taur sita.

Aprezentasaun projetu sira-ne’e, Governu fiar katak sei loke dalan ba forma foun no promisora ida husi debate orsamentál, hodi substitui diskusaun kona-ba tetu orsamentál (ne’ebé define ona iha rúbrika no kategoria sira), no iha ámbitu diskusaun ne’e nian maka iha valorasaun exesiva husi grau ezekusaun orsamentál nian, ho diskusaun kona-ba objetivu sira-ne’ebé atu atinje atu fó benefísiu ba sidadaun sira no ba ekonomia rai laran.

“Kona-ba informasaun ne’ebé presta ona iha dokumentu apoiu ba proposta orsamentál nian, ha’u labele subar no tenke fahe ho señor deputadu sira. Ha’u-nia esperansa atu ita bele hahú forma foun diskusaun nian kona-ba orsamentu jerál Estadu, hodi foka liubá vantajen sira-ne’ebé mai husi implementasaun husi orsamentu ne’e ba ema no empreza sira, duké foka ba kuantidade osan ne’ebé órgaun no serbisu sira administrasaun públika gasta tinan-tinan”, Xefe Governu espera.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here