Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), ohin, iha sesaun plenária hodi debate proposta Orsamentu Jerál Estadu 2020. Imajen/ Egas Cristovão.

DILI, 02 dezembru 2019 (TATOLI) – Primeiru-Ministru (PM), Taur Matan Ruak, hateten Oitavu Governu Konstituisonál kontinua fó apoia ba Timor-Leste (TL) nia partisipasaun iha esposizaun Dubai iha 2020.

“Governu ida ne’e apoia tebes Timor-Leste nian partisipasaun iha expo Dubai”, Xefe Governu, afirma iha ámbitu debate proposta Orsamentu Jerál Estadu (OJE) 2020 iha jeneralidade iha Parlamentu Nasionál, ohin.

Xefe Governu ne’e dehan tanba liuhusi partisipasaun eventu internasionál sira bele fó efetu pozitivu husi rai-li’ur mai Timor-Leste hodi hala’o dezenvolvimentu nasionál.

Primeiru- Ministru adianta liuhusi partisipasaun Timor-Leste iha Expo Dubai bele promove aan iha internasionál.

Entretantu, Governu mós nomea ona Francisco Kalbuadi Lay sai nu’udar Autoridade Timor-Leste ba Expo Dubai.

Antes ne’e, Diretór Jerál Turizmu Ministériu Turizmu, Komérsiu no Indústria, José Filipe Dias Quintas, informa Governu prevee orsamentu ba espozisaun Dubai liuhusi proposta Orsamentu Jerál Estadu (OJE) 2020 ho montante millaun $2.

“Orsamentu ba Expo Dubai ne’e prevee millaun $2,9, ami halo revizaun ba millaun $2,1 mais sei redús fali tanba ita hatene OJE 2020 Governu iha ona informasaun atu redús, ne’ebé sei redús tan bele to’o millaun $2 hanesan ne’e”, Diretór Jerál Turizmu ne’e katak.

Expo Dubai 2020 ne’e diferente uitoan ho Expo Milan (Itália) 2015, ne’ebé expo ne’e sei iha atividade barak, presiza orsamentu boot atu halo preparasaun di’ak.

“Orsamentu ne’e sei foka liu ba organiza buat lubuk ida, promosaun, iha viajen tanba ita-nia pavillaun ne’e mós boot ne’ebé staff mós tenke aumenta to’o 30 no sei uza mekanizmu rotativa ka sei troka malu, la’ós fulan neen tomak iha ne’ebá”, katak.

Timor-Leste hetan priviléjiu di’ak tebes tanba Governu Dubai apoia fatin gratuita no sei fó kontentór ida gratuita ne’ebé bele aproveita lori produtu sira ne’ebé selesionadu ona.

Partisipasaun Timor-Leste to’o fulan neen, ne’ebé prepara pesoál sira atu atende vizitante sira tanba husu setór turizmu, investimentu, agrikultura, istória no kultura.

Aléinde ne’e, Timor-Leste mós sei organizasaun forum negósiu liuhusi Tradelnvest iha área oin-oin no ba internasionál dame, sei iha panelista husi José Ramos Horta no figura balun hanesan Kay Rala Xanana Gusmão atu fahe esperiénsia Timor-Leste ho Indonézia liuliu rekonsiliasaun, atu sai hanesan referénsia ba nasaun sira seluk.

Espozisaun mundiál ne’e, sei partisipa kuaze nasaun 192, ne’ebé sei selebra iha Dubai-Uni Emirat Arab, hahú iha 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : Governu Prevee Millaun $2 ba Expo Dubai

Hahú Define Produtu Ne’ebé Iha Ona Sertifikasaun Atu Promove Iha Expo 2020

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here