Primeiru-Ministru aprezenta programa Governu no orsamentu iha Parlamentu Nasionál. Imajen Tatoli/ Egas Cristóvão

DILI, 02 dezembru 2019 (TATOLI)–Primeiru-Ministru (PM), Taur Matan Ruak, rekoñese orsamentu jerál Estadu (OJE) 2020 risku ba sustentabilidade fundu petrolíferu, maibé aposta ba realizasaun investimentu estratéjiku.

Governu submete ba diskusaun no aprovasaun husi Parlamentu Nasionál OJE nian ida ba tinan 2020 ho despeza públika estimada ida ho valór biliaun $ 1.950.

“Maski ambisioza no hasoru risku, proposta orsamentál ne’ebé aprezenta daudaun ne’e tau mós konsiderasaun ba risku sira-ne’ebé liga ba proposta orsamentu nian ne’e, liuliu kona-ba sustentabilidade Fundu Petrolíferu nian”, aprezentasaun Primeiru-Ministru, Taur Matan Ruak, iha debate jeneralidade OJE loron dahuluk, iha Plenária Parlamentu Nasionál, segunda ne’e.

Xefe Governu argumenta, baze no konsulta públika ida kle’an, tuir Jornada Orsamentál nian, ne’ebé realiza tuir ho kuadru legál ne’ebé vigora no iha firme konviksaun katak kuadru legál ide-ne’e sira (Governu) kumpre duni.

Governu hatene katak ba rikeza petrolífera ne’ebé kálkula ba millaun $17,891,8, rendimentu sustentável estimadu (RSE) sei korresponde ba millaun $536,8, besik millaun $7,8 boot liu kompara ho tinan 2019 nian.

Tuir PM katak ne’e importante atu rekoñese nesesidade atu kontinua aposta ba realizasaun investimentu estratéjiku ba sustentabilidade husi ekonomia no ba futuru nasaun nian.

Nune’e mós nesesidade atu haforsa investimentu públiku ne’ebé destina ba dezenvolvimentu lokál no komunitáriu, determinante ba koezaun territoriál no atu hadi’a kondisaun moris populasaun nian.

Nia hatutan, motivasaun desizaun atu propoin ba Parlamentu Nasionál, atu transfere husi Fundu Petrolíferu ho totál millaun $1,466,5, ne’ebé reprezenta transferénsia ida ho totál millaun $ 929, boot liuhusi Rendimentu Sustentável Estimadu (RSE).

Governu fiar metin katak labele ka lakohi taka matan ba nesesidade hirak-ne’ebé maka sidadaun Timor-Leste sente, tanba ne’e importante tebetebes, no determinante ba susesu nasaun nian iha futuru, atu intensifika investimentu públiku hodi hatán ba problema báziku ne’ebé loroloron sidadaun komún sira sente, tantu iha nível abitasaun, via komunikasaun, edukasaun no kualifikasaun husi jerasaun foun sira nian, asesu ba merkadu serbisu nian, iha dezenvolvimentu atividade ekonómika, entre sira seluk tan.

“Ami la taka matan ba preokupasaun sira-ne’ebé durante semana hirak ikus ne’e responsável polítiku nasionál barak no setór oioin husi ita-nia sosiedade sivíl hato’o kona-ba valór husi transferénsia husi Fundu Petrolíferu ne’ebé Governu propoin atu realiza iha tinan fiskál mai-ne’e. Maibé, kaer ukun ne’e ninia implikasaun maka foti desizaun hirak-ne’ebé kompleksa no difísil, ne’ebé ninia referénsia maka sempre hala’o interese públiku nian”, nia katak.

Taur tenik, Governu respeita no saúda hanoin hirak-ne’ebé personalidade barak fó-sai ona liuhusi komunikasaun sosiál no rede sosiál sira, no konsidera hanoin sira-ne’e hanesan manifestasaun husi vitalidade husi demokrasia no opiniaun públika, nune’e mós husi domin ne’ebé timoroan sira iha ba sira-nia rai-doben, maski iha opiniaun no pontu devista oioin no la hanesan ne’ebé fahe-lisuk iha espasu públiku.

“Ida-ne’e atu dehan katak inezisténsia husi risku agravadu nian ba sustentabilidade Fundu Petrolíferu nian bele komprova mós husi faktu katak valór husi transferénsia ne’ebé maka daudaun ne’e Governu propoin ba Parlamentu Nasionál ba tinan 2020 nian, ki’ik liu duké autorizasaun ne’ebé presta ba transferénsia ne’ebé maka realiza ona iha tinan 2016, ho diferensa besik dolar amerikanu millaun atus-rua ualu”, nia afirma.

“karik sustentabilidade Fundu Petrolíferu nian laiha risku, laiha razaun forte ka rasionál atu fiar katak bele hamosu risku ho transferénsia valór ne’ebé millaun atus-rua ualu ki’ik liu kompara ho tinan 2016 nian!”, Xefe Governu hatutan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here