Santuáriu Nossa Señora Aitara iha Kapeliña laran. Imajen Tatoli/Joanico de Araújo

MANATUTO, 02 dezembru 2019 (TATOLI)–Pároku Parókia Soibada, Pe. Tiago Soares da Costa, hateten fatin Santuáriu Nossa Señora Aitara, lokaliza iha Postu Administrativu Soibada, Munisípiu Manatuto, ne’ebé sai ona hanesan fatin peregrinasaun, daudaun ne’e parte Parokia iha ona inisiativa atu konserva fatin refere sai hanesan fatin orasaun.

“Ha’u mak agora tau-matan ba fatin Santuáriu Nossa Señora Aitara no agora mehi hela atu konserva sai fatin orasaun nian. Tanba bainhira loron sábadu, ema hotu mai konserva iha fatin ne’e hodi halo orasaun,” tenik Amu Tiago ba Agência Tatoli iha Rezidénsia Parokia Soibada, segunda ne’e.

Padre ne’e haklaken, iha loron sábadu hanesan loron ne’ebé própriu ba sarani hotu iha Soibada atu reza ba nasaun no kreda iha Santuáriu no iha mós misa ne’ebé hahú tuku 5:00 loro-kraik.

Kapeliña Nossa Señora Aitara. Imajen Tatoli/Hortençio Sanchez

“Maski nune’e la taka dalan mós ba peregrinu sira-ne’ebé atu mai no husu ha’u atu ba reza no halo misa ba sira. Ha’u prontu atu ba halo misa iha Santuáriu”, nia akresenta.

Nia dehan, sarani sira ba vizita Santuáriu, barak liu iha fulan-maiu ne’ebé hanesan fulan Na’in-Feto nian. Aleinde ne’e, tempu bailoron hanesan fulan-jullu to’o agostu mós sarani sira barak ho karreta no motór hosi fatin-fatin ba vizita Santuáriu hodi halo orasaun.

Relasiona ho kondisaun estátua Nossa Señora Aitara, Amu Tiago dehan nia oin komesa nakfera.

“Kondisaun estátua Nossa Señora di’ak hela. Maibé nia oin mak nakfera uitoan tanba estátua antigu. Foin lalais buka hela ema atu mai konserva maibé seidauk, hafoin mosu dezastre naturál ida iha fulan-maiu nia laran entre loron 1 to’o 11 no udan boot kuaze loron-kalan ne’ebé afeta ba estrada sa’e ba Santuáriu nian kotu, maibé agora daudaun kompañia Fitun Sia mak ho ninia kolega Xina sira agora mai hadi’a hela”, nia informa.

Amu Pároku ne’e dehan tan, haree ba kondisaun estrada ne’ebé sei iha hela prosesu konstrusaun nia laran, ba oin bainhira estrada no buat hotu di’ak ona maka sei transforma fatin ne’e ba fatin orasaun nian ne’ebé sei la reza de’it iha sábadu.

“Bainhira estrada sira di’ak hotu ona ita sei loke fatin ne’e atu sarani sira ba halo orasaun la’ós iha sábadu de’it, maibé loron baileet mós bele. Agora daudaun Santuáriu ne’e loke ba sarani hotu. Kona-ba kontribuisaun ba sarani sira atu fó bainhira tama ne’e lae! Ami só rekolla de’it sira nia kontribuisaun ne’ebé sira halo orasaun ramata tau iha Nossa Señora ninia fatin mak ami foti de’it sira ne’e hafoin deside hamutuk atu halo saida”, dehan Amu Tiago.

Nia subliña, maski nune’e parte Pároku iha ona hanoin atu bainhira sarani sira tama iha fatin ne’ebá bele tau netik kontribuisaun ruma, nune’e bele tulun Uma-kreda.

“Maibé hanoin hirak-ne’e seidauk bele realiza tanba nia husu hela ba Dioseze atu tau tan Padre ida iha Soibada, nune’e Amu-lulik ida sai hanesan Pároku no ida bele toma konta de’it ba Santuáriu atu bele halo planu kona-ba atendimentu peregrinu sira-ne’ebé atu mai hala’o orasaun”, nia dehan tan.

Entretantu, iha loron 13 outubru 2002, Dioseze Dili no Baucau tuur hamutuk hodi deside ona 16 outubru sai hanesan loron ba Nossa Señora Aitara nian hodi halo selebrasaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here