MANATUTO, 02 dezembru (TATOLI)–Pároku Parókia Soibada, Pe. Tiago Soares da Costa, hateten iha tempu okupasaun, Misionáriu sira iha Soibada konsege harahun pensamentu kolonializmu sira kona-ba edukasaun.
“Ha’u husu atu nai-ulun sira, liuliu ba governante atuál VIII Governu nian, sei hadomi Soibada hanesan fatin antigu ne’ebé forma ema no halo ema sai ema, entaun tenke tau-matan ba Soibada, tanba hosi Soibada maka Misionáriu sira harahun pensamentu kolonializmu nian ne’ebé hateten katak Timor labele fó edukasaun liu kuarta klase no tenke to’o de’it kuarta klase”, tenik Amu Ba Agência Tatoli iha ninia rezidénsia Soibada, segunda ne’e.
Nia haktuir, durante tinan 450 nia laran iha okupasaun portugés, polítika refere hanehan beiala sira.
“Misionáriu sira iha Soibada haree ba katak formasaun sai katekista tenke fahe misionáriu iha Timor laran komesa tinan 1904 to’o 1936. Entaun, komesa uituoan forma ema no komesa haree katak presiza haree ema atu kontinua sai Padre, nune’e iha tinan 1936 taka eskola katekista no komesa loke fali semináriu”, nia akresenta.
Amu Tiago subliña, momentu ne’ebá semináriu ho objetivu atu forma ema atu sai ema, tanba ne’e liuhosi semináriu maka bele liu kuarta klase ba primeiro ano, maibé sei la tama semináriu to’o kuarta klase tenke asume ona kargu militár obrigatóriu no hotu tenke ba serbisu.
“Maibé tanba mai ho semináriu no presiza ema hodi aprende filozofia no teolojia, entaun ita-nia Saudozu Francisco Xavier, Nicolau Lobato, líder nasionál Ramos Horta, Rogério Lobato, no seluk tan, tama iha semináriu ida-ne’e (Colégio Soibada) no kontinua ba Dare, hafoin ba Macau no ba Portugál”, nia haktuir.
Nia salienta, “Ho ida-ne’e maka kuandu sira eskola tiha iha ne’ebá, sira foin aprende no hetan matéria kona-ba forma nasaun, entaun sira komesa neon nakloke hodi hateten katak ita tenke foti desizaun sai hosi semináriu hodi envolve iha polítika hodi forma partidu no prepara Timor ba independénsia”.
Jornalista: Hortençio Sanchez
Editór: Xisto Freitas
