Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), ohin, iha sesaun plenária hodi debate proposta Orsamentu Jerál Estadu 2020. Imajen/ Egas Cristovão.

DILI, 02 dezembru 2019 (TATOLI)–VIII Governu Konstitusionál liuhusi proposta orsamentu jerál Estadu (OJE) tinan 2020, valoriza sidadaun sira, liuliu juventude no grupu sira-ne’ebé konsidera vulnerável no mukit liu, maibé Governu valoriza mós empreza, investidór no forsa sira sosiedade sivíl nian ne’ebé halo parte ba ekonomia rai-laran ne’ebé dinámika.

Iha rezumu aprezentasaun debate OJE 2020 loron dahuluk, segunda ne’e, iha plenária Parlamentu Nasionál, Primeiru-Ministru, Taur Matan Ruak hateten atu bele kontribui no atu nasaun ne’e bele atinje rezultadu pozitivu, Governu hein disponibilidade hanesan baibain husi parseiru dezenvolvimentu sira hotu, no mós aposta ida forte iha reforsu ba relasaun amizade no kooperasaun bilaterál no multilaterál.

Xefe Governu esplika liután, reforsu relasaun amizade ne’e atu promove integrasaun rejionál no internasionál nasaun nian no fasilita ema, empreza no organizasaun sira-nia asesu ba sistema no merkadu internasionál sira.

“Hirak-ne’e maka medida prinsipál sira-ne’ebé ha’u destaka iha rezumu, iha aprezentasaun kona-ba proposta orsamentu jerál Estadu ba tinan fiskál 2020 nian ne’e”, nia subliña.

Tuir kompromisu ne’ebé VIII Governu Konstitusionál asume, Taur afirma, proposta orsamentu jerál Estadu nian ida-ne’e mai husi esforsu boot ida atu halo diálogu no husi preokupasaun boot ho família no ho empreza sira.

“Ho proposta ida-ne’e ita valoriza ita-nia sidadaun sira, liuliu juventude no grupu sira ne’ebé ita konsidera vulnerável no mukit liu, maibé ita valoriza mós empreza, investidór no forsa sira sosiedade sivíl nian ne’ebé halo parte ba ita-nia ekonomia ne’ebé dinámika”, Taur halo rezumu.

Nia fó hanoin katak diálogu ne’ebé hahú ona iha fulan hirak liubá, la hotu. Tanba ne’e, Governu sei kontinua disponível no nakloke ba diskusaun kona-ba proposta sira-ne’ebé bele hadi’a dokumentu ne’e, naran katak proposta hirak-ne’e fó dalan ba konkretizasaun objetivu sira-ne’ebé konsagra ona iha Programa Governu, ne’ebé Parlamentu Nasionál diskute ona no la rejeita.

“Ha’u hein katak Parlamentár sira-hotu sei kontribui ho hanoin konstrutivu ba prosesu orsamentál ne’e, ne’ebé sei konta duni ho prezensa, partisipasaun no kontribuisaun ativa husi membru Governu sira. Ha’u fiar katak ita hamutuk bele hetan solusaun ne’ebé di’ak no sustentável liu, hodi alkansa rezultadu sira-ne’ebé di’ak liu, hodi konsolida ita-nia konkista no hodi hakat liu dezafiu sira-ne’ebé ita-nia nasaun hasoru”, PM Taur hakotu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here