Primeiru-Ministru aprezenta programa Governu no orsamentu iha Parlamentu Nasionál. Imajen Tatoli/ Egas Cristóvão

DILI, 02 dezembru 2019 (TATOLI)—Governu liuhosi Ministériu Administrasaun Estatal (MAE), prevee tokon $79,624 ba Administrasaun Munisipál 12 iha orsamentu jerál Estadu (OJE) 2020.

“Polítika VIII Governu Konstitusionál aloka orsamentu própriu ba Autoridade no Administrasaun Munisipál iha 2020 hamutuk tokon $79,624. Ne’e refere ba Desentralizasaun Administrativa no Podér Lokál ne’ebé oras ne’e iha ona Komisaun A”, Relatóriu Komisaun C ne’ebé lee hosi Relatór Deputadu António da Conceição, iha debate loron dahuluk iha jeneralidade, segunda ne’e, iha plenária Parlamentu Nasionál.

Totál despeza 2020 ba munisípiu 12 kompostu hosi saláriu no vensimentu tokon $21,402, bens no serbisu tokon $25,583, transferénsia públika tokon $10,090, kapitál menór tokon $3,793 no kapitál dezenvolvimentu tokon $18,757.

Hosi totál orsamentu ne’e, Administrasaun Baucau hetan tokon $7,345, Bobonaro tokon $7,198, Dili tokon $15,236, Ermera tokon $6,33, Aileu tokon $4,707, Ainaro tokon $5,177.

Nune’e mós, Administrasaun Munisipál Covalima hetan tokon $5,667, Lautém tokon $6,020, Liquiçá hetan tokon $4,963, Manufahi tokon $5,536, Manatuto tokon $5,503 no Viqueque hetan tokon $5,940.

Aleinde ne’e, kontribuisaun orsamentu hosi programa prioridade ba munisípiu 12 hamutuk tokon $116.0. Hosi totál orsamentu ne’e, aloka ba Projetu Desenvolvimentu Integradu Munisipál (PDIM) hamutuk tokon $24.1, aloka ba Programa Nasionál Dezenvolvimentu Suku (PNDS) tokon $15.0, aloka ba Eskola Edukativa hamutuk tokon $21.6, Programa Saúde hamutuk tokon $5.3, aloka tokon $50.0 ba Uma Kbiit Laek.

Hafoin ida-ne’e, tokon $3.0 ba rezervatóriu bee-moos, aloka tokon $2.0 ba jestaun animál, tokon $2.0 ba autoempregu, tokon $2.5 ba uma-lulik no prezervasaun kulturál, aloka ba Konsellu Polísiamentu Komunitária hamutuk tokon $1.5 no atividade rotativa feto rurál hamutuk tokon $1.5.

Iha parte seluk, projetu balun sei implementa direta hosi nível nasionál hamutuk tokon $97.9 iha OJE 2020.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here