Primeiru-Ministru Aprezenta Programa Governu iha Parlamentu Nasionál.Imajen/ Egas Cristovao

DILI, 02 dezembru 2019 (TATOLI) – Primeiru-Ministru (PM), Taur Matan Ruak, hateten Oitavu Governu kontinua esforsu liuhusi planu asaun no orsamentál hodi hasa’e kreximentu ekonómiku Timor-Leste (TL) ba 7,2% iha tinan oin.

“Durante tinan ida-ne’e, ekonomia hatudu ona sinál rekuperasaun no aselerasaun, ne’ebé bele haree momoos. Kreximentu ne’ebé forte husi ita-nia Produtu Internu Brutu la’ós-Petrolíferu, ne’ebé daudaun ne’e kalkula ba 5,1%, fó mai ita konfiansa no espetativa ne’ebé boot atubele alkansa iha tinan 2020, kreximentu ekonómiku ida hamutuk 7,2%, atu kumpre hotu ita-nia kompromisu ne’ebé Governu asume ona ba povu no ba Parlamentu Nasionál liuhusi ninia programa”, Xefe Governu afirma iha ámbitu debate proposta lei Orsamentu Jerál Estadu (OJE) 2020 iha Parlamentu Nasionál, ohin.

Xefe Governu friza estabilidade polítika no sosiál ne’ebé Governu promove ona to’o oras ne’e, dudu ona kreximentu atividade husi ekonomia nasionál no sei permite, iha futuru.

“Hadi’a ba beibeik kondisaun moris ita-nia povu nian, ne’ebé hatudu ona iha retornu ba konsumu família, ne’ebé tenke rejista kreximentu ida besik 3% iha tinan 2020, hodi kontribui ba redusaun ida ne’ebé signifikativu ba taxa pobreza, tinan ne’e, ba 31,8%, ne’ebé reprezenta menus pontu porsentuál sanulu, bainhira kompara ho tinan fiskál 2014″, katak.

Eis Prezidente Repúblika ne’e adianta tempu to’o ona atu filafali ba normalidade kompleta no aposta iha impulsu forte no foun ida ba investimentu, hodi estimula atividade setór privadu, kreximentu ekonómiku no moris di’ak ita-nia povu nian.

“Iha mandatu besik fulan sanulu-resin ualu, balansu ne’ebé ita halo ne’e pozitivu tebes ita konsege hakat liu inserteza sira no manán esperansa no konfiansa husi timoroan sira no husi organizasaun sosiedade sivíl, kona-ba projetu ambisiozu Governu nian, ne’ebé hakarak promove klima estabilidade polítika, finanseira no ekonómika nian ida iha ita-nia territóriu nasionál tomak”, katak.

Xefe Governu ne’e dehan : “Ami buka ona esforsu atu hetan konfiansa husi ita-nia povu no ein jerál husi ita-nia instituisaun demokrátika sira, maske iha obstákulu barak ne’ebé Governu hasoru no difikuldade sira ne’ebé mosu tanba formasaun Governu nian seidauk kompleta. Biar nune’e, kuadru ida ne’e la impede rekuperasaun graduál husi ita-nia ekonomia atu to’o ba nivel kreximentu ne’ebé rejista ona to’o tinan 2016”, kompromete.

Iha tinan ida ho balu nia laran ne’e, Primeiru-Ministru rekoñese sei kontribui ba pás no estabilidade polítika no sosiál iha país ne’e.

Governu ne’e hodi fó onra ba ninia kompromisu ne’ebé firme atu kontinua serbisu hodi hamenus taxa dezempregu (ne’ebé sai duni nu’udar dezastre sosiál ida, liuliu ba ita-nia populasaun foin-sa’e) liuhusi investimentu ne’ebé propoin ona iha Orsamentu Jerál Estadu nian ba edukasaun, formasaun, kapasitasaun, abilitasaun téknika no profisionál ba rekursu umanu timoroan sira.

Investimentu sira ne’ebé Governu propoin atu hala’o liuhusi Orsamentu Jerál Estadu nian no reforsu orsamentál ba Fundu Dezenvolvimentu Kapitál Umanu (FDCH, sigla portugés).

“Sei tulun ita-nia maundeobra nasionál hodi hatán ba ezijénsia kona-ba kompeténsia no exelénsia nian ne’ebé merkadu traballu ezije ba traballadór sira hotu, ida ne’e sei ajuda kontribui atu atinje meta ambisioza atu kria serbisu foun 60.000 iha prazu badak nia laran”, afirma.

Governu iha konxiénsia katak sei la fásil atu alkansa objetivu ambisiozu sira ne’e hotu, ne’ebé propoin iha tinan ida de’it nia laran.

“Maibé, ha’u bele asegura ba ita-boot sira katak ami-nia firme intensaun mak atu mantén liuhusi hamutuk ho espíritu kooperasaun institusionál ida leál no ho respeitu tomak ba responsabilidade konstitusionál husi ema hotu nian, ita bele alkansa meta ne’ebé prevee iha programa Governu, to’o iha atuál lejizlatura ne’e nia rohan”, garante.

Aléinde ne’e, iha relatóriu Banku Mundiál (BM) nian espera katak kreximentu ekonómiku iha Timor-Leste sei aselera to’o porsentu 3,9 iha 2019 no iha 2020 bele to’o porsentu 4,6.

Relatóriu Ekonómiku Timor-Leste, abríl 2019 ne’e hatudu katak rekuperasaun ida ne’e sei hetan apoiu hosi despeza públiku ne’ebé maka’as, no mós konfiansa hosi konsumidór no negósiu sira ne’ebé hafoun filafali.

Relatóriu hosi Banku Mundiál ne’ebé publika dala rua kada tinan ho objetivu atu fó análize kontinuasaun kona-ba ekonomia Timór nian ne’e, afirma katak, diminuisaun ida ne’ebé maka’as iha despeza públika hafraku atividade ekonómika iha 2017 no kontinua afeta kreximentu iha 2018.

Despeza públiku aumenta signifikativu tebes iha fulan tolu ikus iha tinan ida ne’e, maibé ida ne’e la sufisiente atu hasees-an hosi kontrasaun ba Produtu Internu Brutu (PIB) naun-petrolíferu ho porsentu 0.7. Maski nune’e, perspetiva ba tinan 2019 indika katak sei di’ak liu kompara ho fulan neen liu bá.

“Ho aprovasaun ba Orsamentu Jerál Estadu tinan 2019 nian iha fulan-fevereiru liu bá, ita hein katak rekuperasaun ekonómiku sei akontese”, tenik Pedro Martins, ekonomista seniór ba Banku Mundiál Timor-Leste nian liuhosi komunikadu ne’ebé TATOLI asesu, foin lalais ne’e.

“Projesaun ba PIB hatudu katak PIB sei sa’e ba 3.9% ho senáriu ida katak iha estabilidade polítika no ekonomia. Ho aumenta despeza Governu nian, apár ho konsumu setór privadu ne’ebé forte, sei fó apoiu ba rekuperasaun ekonómika”.

Relatóriu ne’e mós haree katak inflasaun ba folin sasán sei nafatin ki’ik iha 2.3% no valór dólar amerikanu nian ne’ebé forte kontribui ba aumenta valór taxa ba interkámbiu reál-nian.

Atividade komersiál ne’ebé menus sei iha mudansa tanba esportasaun kafé aumenta no servisu iha área viajen nian no mós importasaun ba bens no serbisu ne’ebé menus.

Presu mina-rai internasionál ne’ebé aas hasa’e reseita mina-rai nian, maski volume produsaun ki’ik, nune’e fó kontribuisaun di’ak ba iha balansu konta atuál.

Relatóriu Ekonómiku Timor-Leste ida ne’e inklui mós análize kona-ba papél agrikultura nian ba redusaun pobreza. Relatóriu ne’e identifika agrikultura hanesan setór xave ida ba redusaun pobreza no diversifikasaun ekonomia-nian, maibé nivel produtividade sei kontinua ki’ik nafatin, nune’e presiza investimentu signifikativu atu fó apoiu hodi hasa’e produsaun.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here