Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), ohin, iha sesaun plenária hodi debate proposta Orsamentu Jerál Estadu 2020. Imajen/ Egas Cristovão.

DILI, 02 dezembru 2019 (TATOLI)–Proposta orsamentál tinan 2020 nian ne’ebé VIII Governu Konstitusionál aprezenta ba Parlamentu Nasionál, segunda ne’e, Governu define ona estratéjia lima ne’ebé hatuur iha liña orientasaun orsamentál.

Primeiru-Ministru (PM), Taur Matan Ruak ninia aprezentasaun iha loron dahuluk debate jeneralidade orsamentu jerál Estadu (OJE) tinan 2020 hateten estratéjia ne’ebé hatuur iha liña orientasaun orsamentál lima mak hanesan: promosaun moris-di’ak sosiál, protesaun sosiál no sidadania, investimentu ekonomia nian no investimentu iha reforma finansa públika, hadi’a konetividade nasionál, konsolidasaun no reforsu defeza, seguransa no relasaun esterna, konsolidasaun, reforsu justisa, demokrasia no direitu umanu.

“Kontráriu ho opiniaun balun ne’ebé responsável polítiku nian fó-sai, liña orientasaun orsamentál nian ne’ebé Governu define ona la’ós nu’udar Programa Governu ida-ne’ebé diferente ka alternativu husi ida-ne’ebé maka debate ona iha ne’e, maibé ida-ne’e hanesan de’it forma ida-ne’ebé di’akliu atu estrutura, organiza no implementa opsaun programátika sira ezekutivu ida-ne’e nian no atu reflete opsaun sira-ne’e iha OJE nian ba tinan 2020”, Xefe Governu aprezenta iha plenária Parlamentu Nasionál.

PM Taur esplika detalla hahú husi liña dahuluk husi liña orientasaun orsamentál sira-ne’e liga ba promosaun moris-di’ak sosiál, protesaun sosiál no sidadania, konta ho proposta alokasaun nian ida hamutuk millaun $862.658.263,00 (dolar amerikanu millaun atus ualu neen-nulu resin rua, rihun atus neen limanulu resin ualu, atus rua neen-nulu resin tolu) ne’ebé destina ba investimentu hirak-ne’ebé atu hala’o iha rede asesu no distribuisaun bee-moos nian no iha rede saneamentu báziku, iha melloria jeneralizada abitasaun, iha asesu ba edukasaun no formasaun, ba saúde, ba kultura no ba patrimóniu, iha programa sira kona-ba juventude no desportu, iha promosaun inkluzaun, protesaun no solidariedade sosiál ba feto, labarik no ferik-katuas sira, ba ema ho defisiénsia no grupu sosiál sira-ne’ebé vulnerável ka hasoru risku eskluzaun nian.

Nia hatutan, investimentu ne’ebé atu realiza iha ámbitu liña orientasaun orsamentál ida-ne’e nian, ninia objetivu ida mós maka valoriza papél istóriku no papél sosiál atuál husi antigu kombatente libertasaun nasionál no atu estimula no disemina valór sira kona-ba sidadania ativa no patriotizmu nian, atu bele promove no konsolida nasaun no ninia liberdade.

“Iha kuadru prioridade-xave ida-ne’e, Setór Kapitál Sosiál sei hetan porsentu ruanulu resin-sia (%29) husi fundu hirak-ne’ebé aloka iha ámbitu liña orientasaun orsamentál ida-ne’e, ne’ebé porsentu sanulu resin ida (%11) destina ba Edukasaun, porsentu sanulu resin tolu (%13) ba Protesaun Sosiál no porsentu lima (%5) ba Saúde”, Xefe Governu subliña.

Iha ámbitu prioridade ida-ne’e nian, nia esplika tan, Governu propoin mós atu implementa programa foun sira-ne’ebé destina ona atu aumenta empregu no autosufisiénsia sidadaun sira-nian, konstrusaun hela-fatin ne’ebé dignu ba sidadaun sira-ne’ebé vulnerável liu iha sosiedade no ba antigu kombatente libertasaun nasionál nian.

“Programa foun sira-ne’e aliña duni ho objetivu programátiku ba kombate moris-ki’ak no hadi’a kualidade moris husi membru ita-nia komunidade lokál sira, no tenke inklui investimentu sira iha sistema asesu no abastesimentu bee no iha rede saneamentu báziku nian; iha konstrusaun sentru saúde no klínika saúde; iha apoiu ba estudante universitáriu rihun rua (2.000) ; atu sosa ambulánsia no veíkulu ba bombeiru sira; iha konstrusaun no reabilitasaun eskola no sala aula nian”, nia haktuir.

Haree ba importánsia, iha ámbitu liña orientasaun orsamentál ida-ne’e, Taur subliña katak atu realiza investimentu sira-ne’ebé kontribui ba diseminasaun valór sira husi pátria iha territóriu nasionál tomak no reforsu ba identidade nasionál Timor nian, governu propoin alokasaun fundu, iha orsamentu jerál Estadu nian ba tinan 2020, ba konstrusaun edifísiu sira-ne’ebé atu akolle TVTL no RTTL ho kondisaun ne’ebé digna no téknikamente adekuada, ba konstrusaun torre transmisaun sinál televizivu no ba reabilitasaun no konstrusaun Uma-Lulik.

Objetivu sira-ne’ebé estabelese ona tuir lei ba Fundu Dezenvolvimentu Kapitál Umanu nian korresponde ho objetivu programátiku sira Governu nian ne’ebé liga ba liña orientasaun orsamentál ida-ne’e, tanba ne’e, Xefe Governu informa katak, ba fundu ne’e, Governu propoin aumentu ida hamutuk porsentu sanulu-resin-sia vírgula lima (%19,5) husi verba sira-ne’ebé atu aloka ba fundu ne’e, kompara ho verba sira-ne’ebé prevee tiha ona iha orsamentu jerál Estadu nian ba tinan 2019.

“Aprovasaun ba proposta orsamentu jerál Estadu nian ba tinan 2020 husi Parlamentu Nasionál, sei reprezenta la’ós de’it kontinuasaun ba investimentu públiku iha programa sira kona-ba formasaun vokasionál, formasaun téknika, bolsa-estudu no tipu formasaun sira seluk, maibé mós reforsu ne’ebé forte ba investimentu públiku iha kreximentu kualifikasaun husi ita-nia rekursu umanu”, nia hateten.

Kona-ba liña daruak orientasaun orsamentál nian, Taur haklaken, Governu ne’e defende alokasaun millaun $204.554.784 (dolar amerikanu millaun atus rua haat, rihun atus lima limanulu resin-haat, atus hitu ualunulu-resin-haat) ba investimentu iha Ekonomia no iha Finansa Públika nasaun nian.

“Kona-ba setór primáriu, ne’ebé okupa porsentu hitunulu (%70) resin husi populasaun timorense, Governu ne’e hakarak foka ninia asaun, la’ós de’it iha agrikultura, maibé mós iha transporte, distribuisaun, embalajen no armazenamentu produtu agríkola, peskeiru ka florestál sira-nian. Iha setór sekundáriu nian, Governu ne’e propoin atu estabelese Parseria Públiku-Privada (PPP’s) ba dezenvolvimentu indústria petrolífera nasionál nian, nune’e mós ba dezenvolvimentu indústria estrativa ida. Iha setór tersiáriu nian, Governu ne’e hakarak investe iha apoiu ba dezenvolvimentu no expansaun setór turizmu no setór finansa”, nia esklarese.

Atu konkretiza objetivu sira-ne’ebé liga ba liña datoluk orientasaun orsamentál nian, nia hateten, Governu propoin ba Parlamentu Nasionál atu aloka millaun $317.686.517 (dolar amerikanu millaun atus tolu sanulu-resin-hitu, rihun neen ualunulu resin neen, atus lima sanulu-resin-hitu) hodi investe ba melloria Konetividade Nasionál, liuliu ba dezenvolvimentu infraestrutura, maka hanesan Programa Estrada no Ponte sira; setór eletrisidade; governasaun eletrónika; projetu Tasi Mane; nune’e mós programa infraestrutura sira seluk husi área saúde, edukasaun, seguransa no defeza nian, no mós sistema apoiu finanseiru nian ida ba dezenvolvimentu urbanu no rurál.

Objetivu sira husi medida foun iha área sira-ne’e, Taur dehan, atu fasilita mós realizasaun investimentu sira husi setór privadu no kriasaun empregu, atu apoia setór agríkola, hanesan liuhusi fó subsídiu ba transporte produtu agríkola lokál sira, ba kooperativa no ba inisiativa sira-ne’ebé buka atu kria empregu ba an rasik, liuliu husi grupu feto sira-ne’ebé hela iha área rurál.

“Ba promosaun konetividade nian, Governu ne’e propoin atu investe mós iha akizisaun “Nakroma 2” no “Ró Barkasas”, hodi fasilita transporte marítimu iha territóriu nasionál, iha akizisaun autokarru sira hodi asegura ezisténsia transporte koletivu públiku no iha estímulu ba oferta foun sira husi prestasaun servisu aviasaun sivíl nian”, nia relata tan.

Kona mós ba liña datoluk orientasaun orsamentál nian, Governu ne’e sei apoia partisipasaun Timor-Leste nian iha Expo Dubai, ne’ebé Governu konsidera hanesan biban ne’ebé relevante tebes ba projesaun internasionál husi Timor-Leste (TL) no ba kaptasaun investimentu estranjeiru ba ekonomia.

Kona-ba liña dahaat orientasaun orsamentál nian, nia subliña, Governu propoin ba Parlamentu Nasionál atu halo investimentu ida hamutuk millaun $243 (dolar amerikanu millaun atus rua haatnulu-resin-tolu) hodi fó atensaun ba atividade Estadu nian iha área importante sira hodi salvaguarda soberania nasionál, nune’e bele konta ho apoiu husi instituisaun defeza no seguransa ne’ebé transparente, efisiente, kompetente no profisionál, no ativa liután hodi prevene krime no situasaun saida de’it ne’ebé bele fó risku ba estabilidade no pás sosiál iha nasaun.

Governu propoin ba Parlamentu Nasionál, liuhusi proposta orsamentál, atu atribui subsídiu ba Konsellu Polísiamentu Komunitáriu sira (KPK), ne’ebé forma husi grupu joven sira, atu reforsa apoiu ba Polísia Komunitária no ba Polísia Fronteira no atu sosa ró lubun ida ba patrullamentu tasi nian hamutuk 16 atu bele proteje territóriu marítimu no Zona Ekonómika Eskluziva.

Kona-ba liña dalimak prioridade orsamentál nian, ne’ebé liga ba konsolidasaun no reforsu justisa, demokrasia no direitu umanu nian, Taur tenik, Governu propoin ba Parlamentu Nasionál atu halo investimentu ida ho valór millaun $92 (dolar amerikanu millaun sianulu-resin-rua) ba implementasaun programa no medida sira-ne’ebé atu promove sosiedade ida-ne’ebé pasífika no inkluziva liután no atu promove Estadu direitu demokrátiku, igualdade asesu nian, rapidés, efisiénsia no prosimidade servisu justisa nian, no koezisténsia entre justisa Estadu nian ho justisa tradisionál.

“Governu hatene katak hadi’a modelu organizasaun no funsionamentu setór judisiál konstitui fatór determinante ida, la’ós de’it ba konsolidasaun ita-nia Estadu Direitu Demokrátiku, maibé mós ba konfiansa nesesária nune’e investidór estranjeiru sira bele investe iha ita-nia ekonomia nasionál”, Primeiru-Ministru hatutan.

Aleinde investimentu sira ne’ebé atu realiza iha ámbitu liña orientasaun orsamentál sira-ne’ebé deskreve ona iha leten, nia afirma, Governu propoin ba Parlamentu Nasionál, liuhusi proposta orsamentu jerál Estadu ba tinan 2020, atu halo investimentu ida ho valór millaun $202 (dolar amerikanu millaun atus rua rua) hodi hadi’a prosedimentu aprovasaun ba investimentu foun, kria ambiente ida-ne’ebé favorável liután ba dezenvolvimentu indústria turístika, kria ambiente ida favorável liubá dezenvolvimentu no implementasaun projetu komunitáriu, no mós ba implementasaun ba reforma lubun ida iha área administrativa, fiskál no lejizlativa, nune’e mós atu hadi’a jestaun orsamentu nian.

Ikus liu, Taur informa, Governu propoin alokasaun porsentu ida (%1) husi orsamentu jerál Estadu ba Orsamentu Autoridade RAEOA/ZEESM, atu asegura funsionamentu normál husi ninia órgaun no servisu no implementasaun husi ninia projetu dezenvolvimentu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here