Governadór BCTL, Abraão de Vasconcelos. Imajen Tatoli/Egas Cristovão

DILI, 02 dezembru 2019 (TATOLI) – Tuir relatóriu husi Banco Central Timor-Leste (BCTL) iha 2018 hatudu katak populasaun adultu ne’ebé asesu ba finanseira bázika hamutuk porsentu 65. Hosi porsentu 65 ne’e barak liu hosi Dili, no uitoan liu maka Munisípiu Ermera.

“Númeru ne’e husi munisípiu hothotu, ne’e dadus nasionál, ne’e mós ezersísiu ida ne’ebé Banco Central halo kada tinan rua. Relatóriu primeiru lansa iha 2016 no ida segundu maka iha 2018. Dadus ne’e interesante, konserteza katak asesu boot liu ne’e mak hosi Dili, tanba ema hotu besik iha sentru no fásil ba sira atu loke konta bankária, munisípiu ne’ebé uitoan liu maka Ermera, ha’u lahatene sira iha kafé barak loos maibé, ema ne’ebé iha konta bankária uitoan liu. Maibé, Banco Central tenta hela atu hatene tanba sá?”, haktenik Governadór BCTL, Abraão de Vasconselos, iha Timor Plaza, ohin.

Entretantu tuir Governadór ne’e katak, konsentrasaun pontu asesu servisu finanseiru iha Munisípiu Ermera ne’e barak liu hanesan instituisaun sira mikro kréditu, kooperativa no banku, más populasaun adultu Ermera mak konta uitoan liu.

Tanba ne’e difísil atu hatene, maibé importante atu Banco Central halo maka intensiva programa edukasaun finanseira no agora daudauk ekipa la’o bá eskola liuhosi estudante sira tanba alunu maka dalan di’ak liu hodi provoka sira-nia inan-aman.

Governadór ne’e subliña, konta bankária ne’e ninia benefísiu di’ak tebes. “Benefísiu ne’e boot tebes, primeiru, hala’o ita-nia atividade ne’e hanesan ita formaliza ita-nia atividade no loke oportunidade aban-bainrua atu asesu ba servisu finanseira sira seluk ne’e fásil. Ezemplu ida maka iha ona konta bankária ida no atu kréditu fásil ona tanba banku hatene ona ema ne’e antes sai ona kliente”, katak nia.

Iha selebrasaun aniversáriu BCTL foin lalais ne’e, Governadór liuhusi diskursu haktuir katak rezultadu relatóriu 2018 ne’ebé lansa iha abríl 2019 ne’e interesante tebes tanba aprezenta rezultadu lubuk ida ne’ebé ajuda la’ós de’it ba Banco Central maibé, instituisaun finanseira sira própria Governu atu entende saida maka iha, saida maka atinje ona no dezafiu saida mak sei presiza tau esforsu hamutuk hodi atinje ba objetivu komún ne’ebé estabelese iha Planu Dezenvolvimentu Nasionál.

Governadór hatutan rezultadu hosi relatóriu ne’e mak númeru hosi populasaun adultu ne’ebé asesu ba finanseira bázika iha porsentu 65, maibé iha buat ne’ebé interesante maka númeru feto mak partisipa ou iha asesu ba finanseira boot liu mane.

“Iha parte pontu ba asesu ita Timor-Leste iha asesu avansu ida di’ak tebetebes. Ita kompara hanesan porsentu 94 hosi postu administrativu iha asesu ba rede instituisaun finanseira ninian hela de’it postu administrativu haat mak seidauk. Maibé ida ne’e atu hatete katak ita iha mudansa boot kompara ho tinan rua liubá (2016)”, haktuir Abraão de Vasconselos iha Otél Timór, sesta (13/9).

Líder másimu BSTL relata mós katak hahú iha 2015, hamosu inisiativa ida oinsá atu moderniza sistema pagamentu nasionál ne’ebé besik ona to’o alvu.

“Agora daudaun ho haksolok ha’u bele hateten katak ita liu ona dalan klaran ida no ita besik atu ba to’o iha objetivu ne’ebé ita hakarak hosi banku rua (BNU-MANDIRI) ne’ebé hakarak integra sistema P24 ne’ebé mak lansa iha dezembru 2018 no operasaun hothotu la’o ho di’ak. Espera katak banku sira seluk bele joint iha sistema ida ne’e”, afirma.

BSTL aléinde halo mudansa iha modernizasaun sistema nasionál, iha mós mudansa ba jestaun Fundu Petróleu.

“Kona-ba jestaun Fundu Petróleu Timor-Leste hatudu tan avansu partikularmente iha Banku Sentrál. Tanba iha fulan hirak liubá ita-nia Fundu Petróleu hahú investe iha private equity mezmu ida ne’e planu ida antesipa tiha ona iha 2009”, Governadór ne’e konklui.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here