Governadór BCTL, Abraão de Vasconselos, ho entidade BCTL sira hasai foto hamutuk ho delegasaun hosi organizasaun multilaterál sobre Alliance for Financial Inclusion (AFI) iha salaun Timor Plaza, segunda (2/12/2019). Imajen TATOLI/Antónia Gusmão.

DILI, 02 dezembru 2019 (TATOLI) – Banco Central Timor-Leste (BCTL) realiza sesaun traballu ida ho organizasaun multilaterál sobre Alliance for Financial Inclusion (AFI).

Organizasaun Multilateral ne’e kompostu hosi illa pasífika hanesan; Fiji, Papua Nova Giné, Samoa, Illa Solomaun, Tonga, Vanuatu no Timor-Leste.

“Eventu ne’e hanesan sesaun traballu ida ne’ebé Banco Central organiza bodik ba organizasaun multilaterál ida naran Alliance for Financial Inclusion (AFI) ida ne’ebé Timor-Leste hanesan mós membru ida. Tinan rua liubá Banco Central sira hosi pasífiku inklui Timor-Leste lansa inisiativa ida atu armoniza kuadru regulatoriu sobre oinsá atu regula atividade empreza Financial Technology (FILTEC) ou teknolojia finanseira katak empreza sira ne’ebé fornese servisu sira uza plataforma eletrónika”, afirma Governadór BCTL, Abraão de Vasconselos, iha Timor Plaza, ohin.

Governadór hatutan, teknolojia finanseira ida ne’e área ida ne’ebé hanesan dezenvolvimentu ida lori tempu naruk no ninia dezenvolvimentu ne’e foin maka tinan haat ikus ne’e, entaun Banco Central barak la preparadu ba iha mudansa setór finanseira iha mundu, entaun persiza armoniza enkuadramentu legá ida no ezersísiu ida agora halo daudaun ne’e oinsá atu kria enkuadramentu ida.

Abraão esklarese eventu ne’e realiza tanba antes ne’e Banco Central hitu ne’ebé hanesan membru ba Pacific Islands Regional Initiative (PIRI), grupu ne’e estabelese iha Dili iha 2015.

“Ohin ami aprezenta maka buat sira ne’ebé iha ona, hanesan Telemor FILTEC sira-nia produtu Mosan, no mós produtu ida hosi Telekomsel ne’ebé sei lansa iha tempu besik. Ida ne’e hanesan ezersísiu ida halo iha eventu ne’e no Banco Central define tiha kedas ninia kondisaun oins’a empreza sira ne’e atu opera”, afirma.

Entretantu atividade ne’e hala’o durante loron rua, hahú (02/12) no sei remata iha tersa (03/12).

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here