Diretór Luta Hamutuk, José Alves da Costa, Imajen/Egas Cristovão.

DILI, 29 novembru 2019 (TATOLI) – Sosiedade Sivíl ka Organizasaun Naun Governamentál (ONG) Luta Hamutuk (LH) rekoñese katak durante tinan 14 nia laran uza Orsamentu Jerál Estadu (OJE) iha mudansa liuliu iha setór infraestrutura nian.

“Loos duni katak kuaze tinan 17, maibé hahú loloos uza orsamentu Estadu ne’e iha 2005 katak tinan 14 ona kuaze besik biliaun $12 más ezekusaun loloos ne’e biliaun $10. Ami haree katak osan hirak ne’e aloka la tuir padraun ne’ebé ita labele sukat maibé, atu dehan de’it katak atu aat liu ne’e laiha, ezemplu hanesan setór infraestrutura iha mudansa lubuk kompara ho tinan hirak liubá iha tempu Indonézia”, Diretór ONG LH, José Alves da Costa, ba TATOLI iha nia kna’ar fatin Farol, sesta (29/11).

Tuir José Alves da Costa katak, iha setór balu maka rezultadu zero hanesan indústria. “Setór indústria zero, iha setór edukasaun ha’u hanoin loloos avansadu ne’e haree hosi kuantidade, maibé iha kualidade persiza haree filafali tanba ema barak maka remata iha estudu ensinu superiór maibé, tuir fali teste hodi bá buka serbisu iha Austrália no Koreia, más Edukasaun ha’u hanoin iha progresu ida ne’ebé boot tebes”.

Diretór ne’e subliña, kona-ba ekonomia liuliu mikro sei defisil tanba kada família ida atu rai osan hosi banku sei defisil maibé, haree hosi modelu moris iha mudansa tanba kuaze estudante sira foin eskola iha pre-sekundária uza ona smartphone, uma kondisaun seidauk di’ak maibé, sosa uluk karreta, motór, parabola, ne’e tanba jestaun kada família maka seidauk di’ak ne’ebé Governu persiza halo akompañamentu didi’ak para sira bele jere rendimentu ho di’ak maske ki’ik maibé, ho efetivu.

Reitór Univerisidade da Paz (UNPAZ), Adolmando da Silva, dehan objetivu hosi OJE maka Governu atu halo despeza ba programa ne’ebé aprezenta no hosi despeza tenke fó impaktu ba rendimentu umakain povu ki’ik.

“Durante ne’e despeza barabarak, aprova OJE barabarak hosi 2005 to’o 2019 impaktu ba umakain laiha katak povu la hetan rendimentu, más objetivu hosi orsamentu ne’e mak atu hasa’e ekonomia povu ki’ik nian, loke postu servisu ba joven sira no ba edukasaun, agrikultura no saúde maibé, to’o agora setór tolu ne’e ema sei halerik nafatin”, katak Adolmando.

Akademista ne’e salienta katak, OJE durante ne’e laiha efeitu ba povu ki’ik no ba dezenvolvimentu maibé, iha setór infraestrutura iha mudansa uitoan maka estrada, más iha nasionál to’o de’it munisípiu.

Tanba ne’e maka reitór UNPAZ ne’e husu ba membru Parlamentu Nasionál atu diskusaun OJE sai duni reprezentante povu hodi diskute duni povu nia moris no tau interese povu nian aas liu interese grupu.

Notísia relevante : Garante Ekonomia Sustentavel Tenke Investe Iha Setór Produtivu Sira

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here