Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 29 novembru 2019 (TATOLI)-Sekretáriu Estadu Komunikasaun Sosiál (SECOMS-sigla Portugés), Merício Juvinal dos Reis “Akara”, informa, iha 2020, nia parte kontinua fortifika formasaun lian-Tetun  ba Jornalista hosi mídia nasionál  hodi apoiu dezenvolve informasaun ho kualidade.

Notísia Relevante : SEKOMS Sei Minimiza Formasaun ba Funsionáriu iha Estranjeiru

Merício Juvinal dos Reis “Akara” hato’o asuntu ne’e bainhira atribui sertifikadu ba  Jornalista no Asesória Imprensa (Media Officer) hosi Instituisaun Estadu sira  hamutuk na’in 31 maka  partisipa ona formasaun hakerek lian-Tetun durante semana-rua-resin iha Lorosa’e English Language Institute (LELI).

Akara konsidera, formasaun lian ofisiál Tetun no Portugés importante tanba bele apoiu Jornalista sira atu hakerek notísia tuir padraun Institutu Nasionál Linguístika (INL), ne’ebé hatuur iha dekretu lei númeru 01/2004, 14 abríl.

Notísia Relevante : JSMP Sei Fó Formasaun Judisiária Ba Jornalista

“Mídia tenke uza Tetun tuir padraun INL tanba ema seluk aprende tuir ita hakerek no publikasaun sira tanba ne’e direta ka indireta ita promove ita nia lian ofisiál,” hateten Merício Akara, ohin, iha Salaun enkontru Prezidénsia Konsellu Ministru, Palacio Governo.

Nia dehan, Governu liuhosi Fundo Dezenvolvimentu Rekursu Umanu (FDCH) atu fornese kapasitasaun ba Jornalista no Asesória Imprensa sira  tanba ne’e tenke haka’as-aan atu aprende no partisipa iha kualkér formasaun ba futuru.

Iha biban hanesan Diretora Ezekutiva FDCH, Leila Cárceres dos Santos, hatete, kapasitasaun lian-Tetun mós importante atu suporta servisu iha área komunikasaun sosiál sira.

Notísia Relevante : Formasaun Dalen Portugués Ba Jornalista Presiza Habelar Ba Munisípiu Hotu

“Papél FDCH maka atu fó apoiu no kapasitasaun funsionáriu-sira atu hadi’a kualidade servisu liuliu ita haree ba mídia  tanba mídia hanesan portavós nasaun hodi hatutan informasaun to’o iha rai-li’ur,” Leila hateten.

Tuir FDCH nia haree katak formasaun lian-Tetun importante tebes ba Jornalista sira tanba ne’e sei kontinua implementa iha tinan 2020 bainhira Parlamentu Nasionál aprova orsamentu ba item formasaun.

Notísia Relevante : Jornalista Rádiu Komunidade Na’in-20 Partisipa Formasaun Instituto Camões

Jornalista no Asesória Imprensa na’in 31  ne’ebé maka finaliza ona formasaun ne’e mai hosi Jornalista TATOLI, Timor Post, STL, Media PNTL, Ministériu Administrasaun Estatál, Konsellu Imprensa (CI-sigla Portugés), SEKOMS, Ministériu Edukasaun Juventude no Desportu, Ministériu Finansa, SEFOPE, Ministériu Transporte Komunikasaun no seluk tan.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here