Xefe Kaza Sivíl Prezidénsia Repúblika, Francisco Maria de Vasconcelos, ko'a fita simbólikamente iha serimónia entrega karteira ba EBCC São Cristóvão Venilale. Imajen/Cipriano Colo

BAUCAU, 29 novembru 2019 (TATOLI) – Prezidénsia Repúblika liuhosi Gabinete Servisu Apoiu Polítika (SAP) no Servisu Peskiza, hamutuk ho Universidade Nasionál Timor Lorosa’e (UNTL) no Ministériu Edukasaun Juventude no Desportu (MEJD), oferese tan karteira hamutuk 75 ba Eskola Ensinu Básiku Sentrál Katóliku (EBCC-sigla portugés) São Cristóvão Venilale, Postu Administrativu Venilale, Munisípiu Baucau.

Iha Serimónia entrega ne’e, Xefe Kaza Sivíl Prezidénsia Repúblika, Francisco Maria de Vasconcelos, hato’o saudasaun no komprimentu husi Prezidente Repúblika (PR), Francisco Guterres Lú Olo, ba profesór sira hotu, inklui Padre, Madre no estudante sira.

Xefe Kaza Sivíl iha ninia intervensaun hateten, Xefe Estadu ninia kompromisu maka oinsá atu tau matan ba edukasaun ne’ebé ho kualidade, tanba ne’e sei koopera ho Governu atu nune’e tinan ida ba tinan seluk bele hadi’a ensinu eskolár sai di’ak liután.

“Alin-oan sira ne’e ita dehan katak sira maka futuru nasaun nian, tanba ne’e atu futuru di’ak liu maka tenke prepara hahú ohin”, nia tenik, sesta ne’e.

Maski nune’e, ho onestu, Xefe Kaza Sivíl hateten, PR rasik laiha osan atu oferese ba eskola sira inklui karteira hirak ne’ebé oferese ba eskola ne’e, maibé Xefe Estadu iha responsabilidade atu ko’alia ho instituisaun hotu, atu tau forsa hamutuk hodi bele hadi’a di’ak liután kualidade edukasaun iha nasaun ne’e.

” Ezemplu, karteira hamutuk 75 ne’e oferese husi Universidade Nasionál Timor Lorosa’e”, nia dehan.

Ho karteira hirak ne’e, Prezidénsia Repúblika halo de’it buat ne’ebé bele halo tanba dalaruma oferese la to’o ka la kondís ho buat ne’ebé eskola ne’e rasik husu, maibé Prezidénsia rasik esforsu hodi servisu hamutuk ho Governu atu bele kria kondisaun di’ak ba eskola sira.

Tanba ne’e maka durante Prezidénsia Repúblika oferese karteira hirak ne’ebé UNTL prepara, sempre servisu hamutuk ho MEJD hodi fasilita transporte atu bele transporta karteira sira to’o fatin.

Francisco subliña tan Katak, buat ne’ebé Prezidénsia Repúblika halo ohin, la’ós karidade maibé responsabilidade, tanba entidade hotu ne’ebé servisu iha Estadu iha responsabilidade atu atende nesesidade sidadaun sira nian.

Tanba ne’e, hanesan Xefe Kaza Sivíl, husu mós komponente hotu iha eskola ne’e atu ho responsablidade tomak tau matan ba materiál hirak ne’ebé oferese ona hodi bele benefisia alunu sira iha eskola ne’e rasik.

“Mestre no mestra sira, inan-aman sira, liuliu alin estudante sira, karteira hirak ne’ebé ami oferse la barak, tanba ne’e husu atu tau matan didi’ak, kuidadu didi’ak nune’e bele sai útil iha tempu naruk nia laran”, Francisco salienta.

Iha fatin hanesan Administradór Venilale, Carlos Alberto Guterres sente haksolok boot tanba bele hetan tulun husi Prezidénsia.

“Ha’u haksolok no agradese tanba Estadu oferese karteira ba eskola ida ne’e. Ha’u sita mensajen Prezidente Repúblika nian iha loron Proklamasaun Independénsia ba dala-44 katak asuntu edukasaun sai asuntu prioridade atu tau matan hodi dezenvolve”, Carlos espresa.

Xefe Suku Watuhake, Crisóstomo Correia agradese no konsidera Estadu tau duni prioridade ba setór edukasaun, maski neineik maibé beibeik.

“Lori autoridade lokál, inan-aman no Conselho dos Pais, agradese ba laran luak tanba oferese ona ba ami”, nia dehan.

Adjuntu Diretór Eskola, Reinaldo da Silva Freitas, konsidera Xefe Estadu iha duni preokupasaun ba difikuldade hotu ne’ebé eskola sira enfrenta, tanba ne’e nia mós agradese tanba parte Prezidénsia responde duni pedidu ne’ebé eskola ne’e rasik hato’o antes ne’e.

“Ami nia pedidu atu apoiu ami nia eskola ohin realiza duni. Maski ami ne’e eskola privada maibé Prezidente Repúblika hakarak oferese duni karteira hirak ne’e, signifika eskola privada mós eduka timoroan ne’ebé bele kontribui ba rai doben ida ne’e”, nia hateten.

Iha fatin hanesan, estudante Lou Manuela Claudia Belo de Castro, ne’ebé reprezenta estudante hotu hato’o ba Xefe kaza sivíl katak estudante hotu ne’ebé halibur-aan iha eskola ne’e mai husi povu kiik nia oan maibé nu’udár fini ba futuru nasaun nian.

“Hanesan jerasaun futuru, ami hakarak tebes atu hetan edukasaun ida ho kualidade, nune’e aban bainrua ami bele kompete iha mundu nia mudansa teknolojia ne’ebé la’o lais tebes”, nia dehan.

Tanba ne’e, nia agradese ba Prezidénsia ne’ebé oferese ona karteira ne’ebé sei fasilita di’ak liután prosesu aprendizajen.

Ikus liu, Lou aprezenta katak iha fatin formasaun, durante ne’e hetan asisténsia husi Padre no Madre sira husi kongregasaun Salesiana, hamutuk ho profesór sira.

Serimónia entrega ne’e, marka prezensa husi komandante PNTL Postu Administrativu Venilale, reprezentante husi UNTL, MEJD, autoridade lokál, profesór no estudante sira.

Oras ne’e daudaun, estudante iha eskola ne’e hamutuk 217, ho profesór permanente na’in-11, kontratadu na’in-5, no hetan mós asisténsia husi Padre no Madre Salesiana Dom Bosco hodi hanorin kona-ba Relijiaun no Morál.

Antes ne’e, Prezidésia Repúblika, liuhosi Gabinete SAP no Servisu Peskiza hamutuk ho UNTL no MEJD, oferese karteira 75 ba Eskola Ensinu Báziku Sentrál Primeiru no Segundu siklu Nahareka, Postu Administrativu Ossu, Munisípiu Viqueque.

Nune’e mós oferese karteira 150 ba eskola rua iha munisípiu Covalima.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here