Ekonomista no Jurista, Manuel Tilman. Imajen doc Tatoli

DILI, 29 novembru 2019 (TATOLI)—Partidu tolu ne’ebé forma koligasaun Aliansa Mudansa Ba Progresu (AMP) tenke iha responsabilidade polítika ba governasaun VIII Governu Konstitusionál.

Aliansa Mudansa Ba Progresu (AMP) forma hosi Partidu Conselho Nacional da Reconstrução de Timor (CNRT), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) liuhosi eleisaun antesipada 2018 liubá.

“Orsamentu sa’e kuaze biliaun rua ne’e, Governu ida AMP ne’e liuhosi partidu tolu ne’e tenke iha responsabilidade. Labele ida ka rua de’it mak responsabiliza. Responsabilidade polítika katak partidu tolu ne’e tenke tuur hamutuk, la’ós ba halo reuniaun atu halo remodelasaun”, Eis Deputadu Bankada Klibur Oan Timor Asuwa’in (KOTA), Manuel Tilman, ba jornalista sira, iha Tribunál Distritál Dili (TDD), sesta ne’e.

Nia subliña, impase ne’e iha AMP nia laran. Tan ne’e, divia iha unidade no konsolida governasaun ida-ne’e, nune’e bele iha kbiit halo dezenvolvimentu.

Nia argumenta, ho kestaun ne’e halo Governu agora laiha efikásia maski Primeiru-Ministru ema Jenerál ida tanba iha tendénsia ladún koopera malu.

Manuel Tilman observa situasaun polítika oras ne’e hanesan fali desportu ida, mezmuke povu terus hela, polítiku sira la preokupa.

Molok ne’e, rezolusaun ne’ebé AMP hasai liuhusi konferénsia nasionál iha Sentru Formasaun Tibar, 16 novembru liubá, iha pontu 3 sita katak AMP endosa planu asaun anuál no orsamentu ba tinan 2020, ne’ebé mak aprezenta husi portavóz AMP, nu’udar mós Primeiru-Ministru Governu Daualuk, ho observánsia ba: (a) komentáriu no sujestaun ne’ebé aprezenta obra husi kada responsável Komisaun Parlamentár (Komisaun A to’o G)  ba kada setór no /liña ministerál, inklui nosaun atu halo hikas ezersísiu hodi redús montante orsamentu jerál Estadu (OJE) 2020.

(b) kustamentu ba planu asaun anuál, inklui define meta anuál nian tenke aprezenta duni husi instituisaun Estadu/liña ministeriál sira rasik.

(c) asegura kontinuidade no melloramentu sistema planeamentu no orsamentu 2020 ne’ebé orientadu ba rezultadu, iha ne’ebé aliñadu ho programa tinan lima Governu Daualuk, inklui aliñamentu ho liña orientasaun jerál ne’ebé aprezenta no endosa ona iha konferénsia nasionál daualuk AMP nian.

Nune’e mós, pontu 7 hosi rezolusaun ne’e mensiona katak AMP konsidera nosaun atu halo remodelasaun ba Governu Daualuk hodi responde ba nesesidade dezenvolvimentu nasaun nian, liuliu kontribui ba hadi’a dezempeñu Governu nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here