Diretora Correios, Juliana Ximenes. Imajen Tatoli/Hortençio Sanchez

DILI, 29 novembru 2019 (TATOLI)–Diretora Correios, Juliana Ximenes hateten, loloos ne’e, Ministériu hotu labele halo serbisu tuir hakarak, maibé tenke koopera di’ak ho Correios nune’e bele fasilita serbisu di’ak liu.

“Ita haree ministériu sira hotu halo serbisu tuir de’it sira-nia hakarak. Loloos ne’e, ministériu sira atu haruka karta ruma ka sasán ruma ba munisípiu tenke liuhosi Correios mak ami lori bá, duké gasta Governu nia osan ba viajen no mina transporte. Entaun, liu de’it hosi ami. Ami-nia ema sira iha munisípiu sira iha nune’e Correios nia serbisu mós bele la’o nafatin,” Juliana ba Agência Tatoli iha nia knaar fatin, Kintál Boot, Dili, sesta ne’e.

Tanba ne’e, nia tenik, sira-nia parte haree hela oinsá atu komunika ho Governu nune’e bele serbisu hamutuk.

Nia haktuir, antes ne’e, só Embaixada Indonézia de’it mak bainhira haruka karta ba munisípiu liuhosi Correios.

“Embaixada Indonézia sira hatene tanba Correios nia ema iha munisípiu iha. Entaun, sira lori karta ruma mai ka sasán ruma ami kontatu ami-nia ema hosi munisípiu mak mai foti lori ba distribui. Ami-nia ema só Liquiçá, Manatuto no Aileu mak seidauk iha. Serbisu hanesan ne’e mak ita hakarak halo mós ba ita-nia Governu,” Diretora ne’e tenik.

Entretantu, Correios hanesan diresaun ida-ne’ebé hamahan-an iha Ministériu Transporte no Telekomunikasaun nia tutela.

Durante ne’e, Correios hala’o nia serbisu ladún másimu tanba la hetan apoiu másimu hosi Governu liuliu prevee osan hanesan Kapitál Menór no Kapitál Dezenvolvimentu atu aselera serbisu diresaun nian ho di’ak.

Correios nia serbisu mak haruka sasán hosi rai-laran ba rai-li’ur, haruka sasán hosi rai-li’ur mai rai-laran no haruka sasán hosi Dili ba munisípiu nune’e bele fasilita ema hotu atu haruka sasán ba malu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here