Diretora FOKUPERS, Maria José Guterres. Imajen/ TATOLI

DILI, 29  novembru 2019 (TATOLI)-Organizasaun Forum Komunikasaun ba Feto Timor-Leste (FOKUPERS) durante janeiru to’o novembru 2019,  rejista  ona kazu violasaun  hasoru feto no labarik hamutuk 273.

Notísia Relevante : FOKUPERS Hakarak Orsamentu Espesífiku ba Asisténsia Feto no Labarik

Diretora FOKUPERS, Maria José Guterres,  informa, kazu hirak ne’e maioria violénsia doméstika hamutuk 97,  kazu divórsiu 87, kazu abandonadu, insestu ba labarik, violasaun  seksuál, abuzu seksuál tráfiku umanu no seluk tan.

“Maioria prosesu ba kazu sira ne’e iha  ona Ministériu Públiku no balun iha Tribunál hodi halo julgamentu,” informa Diretora FOKUPERS, Maria José Guterres, ohin, ba TATOLI iha ninia servisu fatin Faról, Dili.

Nia dehan, kazu hirak ne’e akontese tanba fatór ekonomia, teknolojia no problema sosiaís sira seluk tan ne’ebé to’o ikus hamosu violénsia.

FOKUPERS iha responsabilidade ho fó asisténsia integradu ba vítima sira akonsellamentu, akomodasaun, uma mahon no seluk tan.

“Iha uma mahon, ami fornese atendimentu integradu. hosi númeru ne’e 273, maioria re-integra fila ona ba sira -nia  hela fatin no daudaun ne’e 31 kontinua iha uma mahon,” tenik Maria José Guterres.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here