Oan hosi Saudozu Maulear, Jorge Carvarino, akompaña hosi família, dada lia ho mídia nasionál sira iha Palásiu Governu, hafoin hasoru malu ho Primeiru-Ministru, Taur Matan Ruak, sesta (29/11). Imajen/Julia Chatarina

Dili, 29 novembru 2019 (TATOLI) – Família husi eroi António Duarte Carvarino ‘Maulear’ no eroina Maria do Céu Gonçalves Pereira ‘Bilear’, hasoru malu ho Primeiru-Ministru, Taur Matan Ruak, hodi hato’o sira nia agradesimentu.

Saudozu na’in-rua hetan kondekorasaun Kolár Orden Timor-Leste a título póstumo, iha selebrasaun loron Proklamasaun Independénsia 28 Novembru 1975 ba dala-44, tanba fó kontributu boot no sakrifísiu durante okupasaun ba libertasaun pátria.

“Ami mai hasoru Primeiru-Ministru, hodi hato’o ami nia agradese ba Estadu Timor-Leste ne’ebé valoriza ona ami nia inan-aman nia kontribuisaun, liuhosi Orden Kolár Timor-Leste ne’ebé fó mai ami orseik”, tenik oan hosi Saudozu Maulear, Jorge Carvarino iha Palásiu Governu, sesta ne’e.

Iha oportuniadade ne’e, sira mós konta tuir sira nia moris durante hela ketak hosi família iha rai seluk, maibé ho esforsu bele hasoru malu iha Timór.

“Agrdese ba oportunidade ne’ebé fó mai ami hodi bele hasoru Primeiru-Ministru. Ami mai hato’o mós ami nia moris durante ne’e la’o hanusa no oinsá mak família bele hasoru malu, no ami ko’alia oituan kona-ba serbisu hamutuk ho Governu”, nia dehan.

Nia haktuir, durante dada lia, Xefe Governu impresionante no konsidera istória úniku tebes no bele halo filme, tanba Saudozu Maulear nia oan na’in-haat durante tinan 41 foin mak hasoru malu.

PM Taur hato’o ba família, importante oan hosi saudozu sira tenke halo sira nia istória no tenke hakerek sira ninia istória sai hanesan lemransa no hanesan valór ida ne’ebé hanesan kontinuasaun ba futuru no jerasaun tuir mai, hodi parte hotu bele akompaña.

Nia informa, iha dada lia ne’e, PM Taur mós dehan ba família katak ba oin Estadu sei esforsu hodi halo monumentu ba Saudozu Maulear no Bilear, no mós saudozu sira seluk.

“Planu ne’ebé Governu define daudaun ne’e liuhosi konsellu Veteranu, sei rekolla dadus hosi veteranu sira ne’ebé durante ne’e buka tuir restu mortál maibé la hetan no ikus liu Estadu Timor-Leste sei estabelese fatin ida hodi halo lemransa ba Saudozu Maulear no Bilear no mós sira seluk hanesan Saudozu Francisco Borges no seluk tan,” taur haktuir.

Iha tinan 1984, Cruz Vermelha Internasionál evakua Jorge Carvarino hamutuk ho ninia bin alin, Leila Carvarino no José António Carvarino husi Dili ba Austrália tanba persegisaun.

Militár Indonézia, Hardiwan, foti oan hosi Saudozu Maulear, Luli Haryo Wirawan iha tinan 1979 no lori ba Indonézia hodi tau matan hanesan oan rasik.

Maulear nu’udar estudante timoroan ne’ebé fila husi Portugal hafoin Revolução dos Cravos no partisipa ativa iha FRETILIN. Hafoin Proklamasaun Independésia, nomeadu nu’udar Ministru Justisa no tinan 1976 sai Komisáriu Polítiku ba Setór Sentru Norte no asume kargu nu’udar Primeiru-Ministru no Vise-Prezidente FRETILIN to’o militár Indonézia kaptura no oho iha 1979.

Bilear nu’udar fundadora ida ba ASDT no FRETILIN. Hafoin Kontra Golpe nu’udar membru Komité Sentrál, Bilear hanesan mós dirijente Organização Popular da Mulher Timor no nomeadu sai Vise-Sekretária Departamentu Edukasaun hodi tau matan ba edukasaun iha Timór laran tomak. Hafoin invazaun, sai Adjunta Polítika iha Setór Sentru Norte to’o militár Indonézia kaptura no oho iha 1979.

Jornalista: Julia Chatarina
Editór: Xisto Freitas

 

HAKEREK NO HATÁN

Please enter your comment!
Please enter your name here