Ekonomista no Jurista, Manuel Tilman. Imajen doc Tatoli

DILI, 29 novembru 2019 (TATOLI) – Ekonomista no Jurista, Manuel Tilman, hateten bainhira Governu hakarak diversifika ekonomia iha rai-laran, presiza mós investe osan boot.

Nia ko’alia asuntu ne’e, relasiona ho mensajen Prezidente Repúblika, Francisco Guterres Lú Olo, iha selebrasaun loron Proklamasaun Independénsia 28 Novembru 1975 ba dala-44, katak ekonomia rai-laran labele depende de’it ba produtu ida, tanba ne’e urjente atu diversifika ekonomia.

“Kona-ba atu diversifika ekonomia ne’e presiza orsamentu ne’ebé boot duni, maibé ita haree Governu loos lai. Ba ha’u deskute asuntu ne’e bainhira orsamentu prevee ona”, tenik Manuel Tilman iha Tribunál Distritál Dili (TDD), sesta ne’e.

Ba nia, diversifikasaun ekonomia ne’e asuntu boot, enkuantu sasan iha rai-laran de’it la folin.

“La folin tanba la’ós sasan mak laiha kualidade maibé povu mak laiha osan atu sosa modo tanba ohin loron ema kuda sasan barak, ida ne’e mak Governu tenke preokupa”, nia dehan.

Manuel Tilman subliña: Ba ha’u orsamentu ne’e la presiza redús, povu ne’e presiza duni orsamentu ida ne’ebé boot para investe iha agrikultura millaun $30 hanesan ne’e, tanba povu agrikultór porsentu 80 moris ho agrikultura no ohin loron agrikultór nia produtu lokál ne’e mak ladún folin. Ida ne’e Governu tenke iha responsabilidade”.

Nia dehan, Primeiru-Ministru, Taur Matan Ruak hatene problema povu nian tanba vizita ona suku 442.

Ekonomista ne’e argumenta, maske boot, Orsamentu 2020 tenke hetan aprovasaun hosi Parlamentu Nasionál hodi bele selu obra sira ne’ebé hotu ona.

“Karik bele selu ona projetu ne’e para ema bele  iha osan no sasan iha rai-laran bele folin”, nia akresenta.

Nune’e, nia husu bainhira deskute orsamentu ba povu, tenke hateke ba povu nia terus no halerik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here