Komputadór iha eskola. Imajen/espesiál

BAUCAU, 29 novembru 2019 (TATOLI) – Adjuntu Diretór Eskola Ensinu Básiku Sentrál Katólika (EBCC-sigla portugés) São Cristóvão Venilale, Reinaldo da Silva Freitas, rekomenda ba Prezidénsia Repúblika atu servisu hamutuk ho Governu hodi fó apoiu komputadór unidade 12 ba eskola.

Reinaldo hato’o kestaun ne’e, durante serimónia entrega karteira 75 husi Xefe Kaza Sivíl Prezidénsia Repúblika, Francisco Maria de Vasconcelos ba EBCC, Sesta ne’e.

Adjuntu diretór ne’e hateten, durante tinan hirak ba kotuk, parte eskola hola komputadór unidade haat no uza hodi fó formasaun ba estudante sira no mós ba profesór sira, maibé iha tinan kotuk formasaun paradu to’o ohin loron tanba komputadór hirak ne’e aat hotu ona.

“Ohin loron, dezenvolvimentu teknolojia avansadu, estudante sira atu kompete Presiza tebes formasaun bázika kona-ba komputadór liuliu Microsoft Word. Realidade hatudu katak ami nia formasaun iha tinan kotuk iha duni rezultadu, ami nia estudante sira ne’ebé ramata husi ne’e hatene uza komputadór. Maibé, ami nia komputadór haat ne’e aat ona, nune’e ami husu apoiu ba Prezidénsia Repúblika atu servisu hamutuk ho ministériu relevante sira hodi tulun ami. Ami presiza tan unidade 12″, nia akresenta.

Reinaldo konsidera kursu komputadór ba profesór sira mós importante tebes tanba ohin loron presiza aprende buat barak hosi bele kompete iha mundu globalizasaun.

Alende ne’e, parte eskola husu atu estudante sira bele asesu instrumentu muzikál tanba iha programa estrakurikuláriu ne’ebé oferese mós kona-ba toka viola, piano, no seluk tan, maibé sei falta instrumentu.

Iha fatin hanesan, estudante Lou Manuela Claudia Belo de Castro, hateten maski hetan ona apoiu balun husi Prezidénsia Repúblika, maibé ho hakraik-aan hakarak hato’o nafatin pedidu ba Xefe Kaza Sivíl karik bele apoiu mós komputadór ho instrumentu muzikál.

“Ami husu de’it komputadór ho ninia printer no instrumentu muzikál ho materiál desportivu hodi bele fasilita ami nia atividade estrakurikulár iha eskola ne’e”, nia dehan.

Kona-ba rekomendasaun ne’e, Francisco konsidera kompeténsia Governu, maibé Prezidénsia mós iha responsabilidade atu hato’o ba ezekutivu sira hodi bele hadi’a kualidade edukasaun liuhosi prepara fasilidade ne’ebé bele fasilita prosesu aprendizajen.

“Prezidénsia Repúblika sei halo buat ne’ebé bele halo no sei kontinua halo servisu atu tulun Governu kria kondisaun ba estudante sira, maibé ida-ne’e mós sei halo fazeadamente tanba labele halo buat hotu dala ida”, nia fó hanoin.

Entretantu, atividade estrakurikulár iha eskola ne’e mak hanesan kursu komputadór ba estudante hotu no profesór tuir oráriu idaidak nian, ne’ebé fora oras eskola nian iha mós atividade desportu hanesan futeból, basketból, vollei ból no seluk tan.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here