Diretór Ensinu Báziku 3 Siklu (EBC) 30 Agostu, Comoro, Dili, Filomeno Salsinha. Imajen: Felicidade Ximenes

DILI, 29 novembru 2019 (TATOLI)-Diretór Ensinu Báziku Terseiru Siklu (EBC)  30 Agostu, Comoro, Dili, Filomeno Salsinha informa katak iha Eskola 30 Agostu, programa saúde eskolár la’o ona tinan-lima nia laran, hahú husi tinan-2015  ho servisu hamutuk ho Ministériu Eduksaun, Juventude no Desportu (MEJD), Ministériu Saúde (MS) no mós Organizasaun Naun-Governamentál (ONG), CRS (Catholic Relief Service) hodi tulun  programa saúde eskolár hodi la´o iha estabelesimentu ensinu ne´e.

Programa saúde eskolár ne’e kompostu husi programa barak ezemplu lorloron ita halo screening ba labarik sira-nia saúde báziku hanesan saúde matan, nehan,tilun, oinsá hamoos an liman kukun sira ne’e tenki mós ne’e ba saúde liuliu ba labarik sira no ida seluk mak saúde nee iha ambiente ne’ebé moos preparasaun ba lixu sira no mós labarik sira iha koñesimentu ne’ebé mak di’ak ba saúde,” dehan Diretór Filomeno Salsinha ba jornalista sira banhira partisipa Konsultasaun ba Planu Estratéjiku Nasionál Saúde eskolár tinan-2020 too 2022 iha Palásiu Sinzas, sexta (29/11/2019).

Nia esplika, ligasaun ho infraestutura ita hatene katak oinsá prepara saúde di’ak presiza materiál sira no programa ne’e atu la’o di’ak mak iha nesesidade bázika hanesan iha eskola tenke iha bee moos ne’e importante atu labarik sira hamoos aan iha fatin hothotu, labarik sira halimar sira tenke moos no mós han sira tenke moos, ida ne’e mak importante liu no iha Eskola 30 agostu atu bele dehan kondisaun mínimu ne’e preparadu tebes.

Iha koñesimentu ba labarik sira sempre halo programa no sira rasik ne’ebé tama ba grupu ida sira hanaran grupu promosaun saúde eskolár, grupu estudante sira ne’ebé mak lorloron ne’e fó informasaun ba nia kolega sira katak ida ne’e tenke halo ezemplu dadersan sira mai grupu promosaun saúde eskolár ne’e tenke halo screening ba sira-nia kolega hanesan sui fuk kaber ona ka seidauk, tesi liman kukun ona ka seidauk, sira sei halo revista ida ne’e mak bolu screening mak hanesan koñesimentu báziku ida ba sira.

Ida seluk tan mak estudante sira tenke kontrola fatin ne’ebé moos, sala eskola tenke moos,kadeira sira tenke moos, lixu sira tenke tau iha nia fatin, molok han tenki fase liman; ida ne’e mak baibain implementa iha eskola. “Ha’u bele dehan fasilidade mínimu iha eskola 30 agostu hothotu husi 1 siklu to´o 3 siklu la’o ho di’ak,” informa Diretór Filomeno Salsinha.

Manorin na´in ne´e esplika liután katak hanesan sokoru dahuluk sira mós hetan treinamentu husi Cruz Vermelha, sira bolu labarik sira ba tuir treinamentu no labarik sira ne’ebé tuir treinamentu ne’e iha koñesimentu uitoan ba sokoru; ida ne’e, karik iha akontesimentu ruma ne’ebé mak atu tulun emerjénsia hanesan iha eskola 30 agostu, sira iha ai-moruk ne’ebé tau iha ne’ebá hanesan fatin emerjénsia hanesan labarik sira monu ka moras sira ajuda maibé kuandu  sira labele  sira kontaktu ba saúde para hodi halo tratamentu.

“Aleinde difukuldade ne’ebé ami enfrenta mak dahuluk progama atu la’o mak orsamentu maibé eskola la kesi metin ba orsamentu maibé ita la’o no tulun husi ONG sira nian ne’ebé ita la’o hamutuk to´o oras ne’e maske ita dehan difikuldade mas programa iha 30 de agostu la’o ho di’ak,” nia konsidera.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here