Foto hamutuk hafoin lansamentu ba sistema rejistu servisu mobile husi Diretór Jerál MTK, Gaspar Soares, neebe akompaña husi Prezidente ANC, João Olívio Freitas. Imajen/Natalino Costa.

DILI, 29 novembru 2019 (TATOLI) – Prezidente Autoridade Nasionál Komunikasaun (ANC-sigla portugués), João Olívio Freitas, hateten ANC nu’udar órgaun reguladora telekomunikasaun nian iha Timor-Leste, ofisialmente lansa sistema rejistrasaun ba servisu mobile ka mobile service registration system (MSRS) atu asegura di’ak liután dadus sim card.

“Ami dezenvolve tan sistema rejistu ba servisu mobile ho objetivu prinsipál atu kapta dadus uzuáriu ou konsumidór hotu ne’ebé maka iha ona baze dadus ne’ebé liuhosi rejistu sim card iha operadór sira”, dehan João Olívio ba jornalista iha salaun Ministériu Transporte no Komunikasaun (MTK), Kaikoli, ohin.

Nia akresenta objetivu prinsipál hosi lansamentu ne’e mak atu asegura liután ba uzu númeru kartaun sim sira ne’ebé rejista ona hosi operadór Timor Telecom, Telkomsel no Telemor.

Tuir nia, dadus hotu ne’ebé rejista iha operadór telekomunikasaun, ANC mós bele asesu atu hatene konsumidór sira ne’ebé uza sim card liuhosi identifikasaun iha baze dadus no órgaun reguladora garante sei laiha infrasaun ruma iha rejistrasaun sim card husi operadór sira.

“Se ita-bo’ot iha sim card rua bainhira soe ida, númeru ida la ativu ona maibé iha ema ruma uza fali, bainhira mosu problema, ita-boot maka responsabiliza tanba ita-bo’ot nia identidade ne’ebé tama ona ba sistema rejistu ba servisu mobile”, katak.

Iha fatin hanesan, Diretór Jerál MTK, Gaspar Soares, hataten lansamentu sistema rejistu ba servisu mobile sai hanesan pasu pozitivu tanba sistema ne’e ho rigór hanesan ho nasaun Austrália ne’ebé uza rejistrasaun sim card ho baze dadus.

Tanba ne’e, ANC husu ba operadór sira atu kontribui no koopera nune’e bele implementa sistema ida ne’e hodi kontribui ba seguransa sibernétika iha rai-laran.

Entertantu, lansamentu ba sistema rejistu MSRS.ANC.TL bazeia ba dekretu lei ANC númeru 9/2008 kona-ba direitu protesaun konsumidór ba uzu telekomunikasaun nian.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here