Deputada Maria Angelina Lopez Sarmento. Imajen Tatoli/Egas Cristóvão.

DILI, 28 novembru 2019 (TATOLI)—Vise-Prezidente Parlamentu Nasionál (PN), Deputada Maria Angelina Sarmento, preokupa ho ezijénsia Prezidente Repúblika, Francisco Guterres ‘Lú Olo’, tanba presiza define tipu diálogu ne’e.

“Ezijénsia Prezidente Repúblika ba diálogu ita la hatene diálogu polítiku ka diálogu ida baibain ka diálogu saida. Presiza énfaze atu ita bele hatene diálogu ne’e katak diálogu ho polítiku sira, ka diálogu ho sosiedade sivíl ka ho povu baibain”, deputada ne’e informa ba jornalista sira, iha resintu Parlamentu Nasionál, ohin.

Deputada Partidu Libertasaun Populár (PLP), rekoñese pedidu diálogu ne’e Prezidente Repúblika nian hanesan buat ne’ebé hatuur iha konstituisaun, maibé presiza define ho klaru.

Iha ámbitu Komemorasaun Proklamasaun Independénsia ba dala-44 ne’e, mensajen Prezidente Repúblika (PR), Francisco Guterres ‘Lú Olo’ kontinua ezije diálogu.

“Ha’u iha konfiansa katak ita sei nafatin fó ita-nia kontribuisaun ativu iha aspetu hotu-hotu hodi partisipa iha diálogu permanente ida hodi buka dalan no konsensu oinsá estratéjia atu hasoru dezafiu hotu-hotu ne’ebé afeta ita-nia sosiedade tomak”, mensajen PR Lú Olo, iha Palásiu Governu, ohin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here