Prezidente Repúblika, Francisco Guterres Lú Olo. Imajen Tatoli/António Gonçalves

DILI, 28 novembru 2019 (TATOLI) – Prezidente Repúblika (PR), Francisco Guterres Lú Olo, hateten sirkunstánsia funu la permite hodi halo debate naruk kona-ba lala’ok funu nian iha tempu ohin loron.

Xefe Estadu hato’o lia hirak ne’e iha ninia diskursu iha Serimónia Komemorasaun tinan 44 Proklamasaun Independénsia iha Palásiu Governu.

“Ita hotu iha direitu hodi hato’o ita-nia hanoin, maibé sirkunstánsia funu-nian la permite hodi halo debate naruk kona-ba lala’ok funu ne’ebé obriga ita foti dezisaun lalais no nune’e kuadru médiu sira hatoman-aan simu no ezekuta orientasaun husi lideransa sira”, tenik Lú Olo, kinta ne’e.

Nia dehan, hotu-hotu tenke submete ba superiór sira iha funu ida ne’ebé lahetan suporta no sura de’it ho timoroan ninia forsa rasik.

Nune’e, PR hatutan, ho konxiénsia no nasionalizmu timoroan nian, hala’o luta ba libertasaun nasionál iha Frente Armada, Frente Klandestina no Frente Diplomátika ka Frente esterna.

Nia rekoñese, ida-idak ho ninia kna’ar maibé sustenta malu no fó forsa ba malu no hothotu tuir estratéjia ida de’it mak liberta rai ne’e husi okupasaun estranjeira.

“Ohin ita halibur malu, iha Praça da Proclamação da Independência, hodi selebra aniversáriu Proklamasaun Independénsia ba dala-44. Iha fatin ida ne’e duni, ha’u sita testu Proklamasaun: “Encarnando a aspiração suprema do Povo de Timor-Leste”, ita-nia ilustre saudozu kompatriota Francisco Xavier do Amaral halo proklamasaun unilaterál independénsia Timor-Leste nian no jura serve Povu no Nasaun nu’udar Prezidente Repúblika”,  nia akresenta.

Xefe Estadu dehan tan, Timor-Leste afirma-aan ba dala-uluk hanesan Povu no Nasaun iha 28 novembru 1975, liuhusi frente ida deit mak FRETILIN, ho Konstituisaun simples ida, tuir sirkunstánsia polítika momentu ne’ebá nian.

“Durante ita-nia prosesu naruk funu ba libertasaun nasionál ita reestrutura ita-nia pensamentu koletivu no ita reorganiza-aan ho maneira oioin tuir situasaun obriga, maibé ho komandu luta polítiku militár ida de’it iha Frente Armada”, nia sita.

Maski nune’e, PR Lu Olo dehan, hahú uluk ho FRETILIN, tuir fali ho organizasaun rezisténsia ne’ebé luan liu, hahú iha tinan 1981 ho lideransa husi sobrevivente na’in rua husi Comité Central FRETILIN, Kay Rala Xanana Gusmão no Ma’Hunu (Bukar) iha Conselho Revolucionário da Resistência Nacional – CRRN iha 1981, Conselho Nacional da Resistência Maubere – CNRM iha 1988, Conselho Nacional da Resistência Timorense – CNRT iha 1998 nafatin ho komandu luta ida de’it, tanba ezijénsia luta nian rasik.

“Iha duni kontestu ida ne’e mak ita realiza ita-nia mehi ba independénsia, liuhusi referendu iha tinan 1999, ne’ebé organiza no superviziona husi Nasaun Unida”, nia subliña.

Xefe Estadu rekoñese mós katak, folin ne’ebé timoroan hotu selu ba ukun rasik-aan todan tebes, nune’e ohin loron timoroan hotu tenke hatene valoriza no tane aas sakrifísiu husi sira hotu ne’ebé lakon sira-nia vida hodi ohin loron Timór moris iha liberdade.

“Iha loron ksolok ida ne’e ha’u hakru’uk ba memória asua’in no mártir sira 1975 nian. Ha’u hakru’uk mós ba maluk hotu-hotu ne’ebé sakrifika-an, fó-aan ba mate ka terus durante ita-nia luta tinan 24 nia laran. Ha’u hakarak hahii papél importante Igreja Katólika nian nu’udar instituisaun ida ne’ebé sempre hamriik iha Povu Timor-Leste nia sorin ho forma luta oioin, liuliu defende valór identitáriu povu Timor-Leste nian”, xefe estadu fó omenajen.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here