Diretora Servisu Munisípal Edukasaun Juventude no Desportu Aileu, Cristina da Conceição. Imajen: Antónia Maia

DILI, 28  novembru 2019 (TATOLI)-Diretora Servisu Munisipál  Edukasaun Juventude no Desportu Munisipiu Aileu, Cristina da Conceição informa katak iha Munisipiu Aileu infraestrutura eskolár ba eskola ensinu báziku sira hanesan sala-de-eula limitadu ba estudante sira tanba ne´e obriga profesór sira hanorin iha sala ida  ho alunu na´in 60.

“Ohin ita rona mesajen sua exelénsia Prezidente Repúblika nian mós foka liu oinsá  atu fó  edukasaun ba labarik ho kualiade. Maibé, kondisaun eskola la sufisiente, ita hatene  katak se 60 profesór ida hanorin alunu 60,  profesór ne’ebe hanorin  ne’e ita bele dehan katak  kari batar musan deit ona,” hateten Diretora Cristina da Conceição ba Ajénsia TATOLI hafoin partisipa seremonia proklamasaun independénsia ba dala 44 iha Munisípiu Aileu, ohin.

Diretora ne´e dehan, atu kontrola tuir padraun lorloron hanorin nian, labele hateten loloos no halo justifikasaun ida ne’ebe loos.

Nia hatutan, problema ba eskola iha munisipiu Aileu rasik  ba iha infraestrutura basiku eskolar kondisaun eskola aat hotu ona .

“Kontrusaun mós ladi´ak, eskola ne’ebé maka harii iha 2009 ho Programa Pakote Referendum ne’e la funsiona hotu kedan kada materiál  fafuluk buat sira ne’e aat hotu ona,” dehan Diretora Cristina da Concição.

“Agora eskola CAFE (Centro Aprendizagem e Formação Escolar) daudaun ne’e ninian ba nia sala de aula la to’o ona ba iha sira  no agora ita buka maka ne’e,  ko´alia ho adminstradór, hodi buka servisu ho pareseiru hodi haree to’ok   maibe espasu ne’e  laiha nafatin, entaun  tuir standar (padraun) kurrikular ne’e susar ita atu hatudu”, dehan nia.

Ba problema ida ne’e, Diretora Cristina da Conceição haktuir, nia parte  submete beibeik ba autoridade kompetente  maibé  seidauk hetan solusaun.

Menus Profesór

Alende infraestrutura, iha parte seluk, Diretora Cristina da Conceição informa katak iha Munisípiu Aileu menus profesór iha estabelesimentu ensinu sira tanba balun reforma ona, balun moras no mate no seluk tan.“Entaun profesór diminui mas aumenta laiha  entaun kestaun ne’e hato’o ona ba iha nasionál mas laiha responde nafatin”.

Hatan kona-ba oinsá kualidade enjerál estudante sira nian iha Munisípiu Aileu, diretora ne´e dehan katak buat hotu depende ba buat tolu hanesan infaetrutura eskolár, edukasaun familiár mai husi inan-aman rasik no esforsu husi oan sira. Maske nune´e, tuir nia, katak prosesu aprendijazen  iha tinan létivu, iha Munisípiu Aileu rasik tuir nafatain padraun kurrikulár.

Entertantu, manorin na´in permanente iha Aileu iha totál  400 resin, husi ensinu pré-eskolár too ensinu sekundária no profesór kontratadu husi pré-eskolár to’o ensinu sekundária mak 100 resin.

Aileu iha eskola pré- eskolár governu nian hamutuk  22, eskola filiál rua no iha mós  eskola privadu, ida iha Remexiu no  husi parseiru dezemvolvimentu PLAN ne’ebé estabelese eskola  pre-eskolár ba komunidade iha 20 eskola  no eskola sekundária tolu de´it ,ida lokaliza iha Laulara , ida iha  Aileu Villa ida iha Postu administrativu Lekidoe.

Jornalista: Natalino Costa

Editór      : Rafy Belo

HAKEREK NO HATÁN

Please enter your comment!
Please enter your name here