Ministru Negósius Estranjeirus no Kooperasaun Dionísio da Costa Babo. Imajen/ Tatoli

DILI, 28 novembru 2019 (TATOLI)-Ministru Negosiu Estranjeiru no Kooperasaun (MNEK), Dionisio da Costa Babo Soares hateten katak komemorasaun loron proklamasaun independénsia importante tebes ba timoroan tomak.

“Ita agradese ba ita-nia aswa´in sira ne’ebé fó isin-lolon, ruin tomak para defende ita-nia rai ohin loron ita sai independénsia, dehan Ministru Dionísio da Costa Babo Soares, ba Ajénsia TATOLI iha serimónia komemorasaun 28 de Novembru ba dala-44 iha Palásiu Governu, Dili, ohin.

Nia informa, iha tinan 1999 ita hotu ba vota, vota ba independénsia, ida ne’e parabéns ida ba ita timoroan hotu.”Ita tenke esforsu ba hala’o fali dezenvolvimentu ba oin, hodi hadi’a ita-nia povu nia moris,” katak nia.

Diplomata timoroan ne’e hatutan, ohin tama ona ba tinan 44, restaurasaun independénsia tinan 20 “Ita-nia dezenvolvimentu klaru sei la’o tuir nia pasu, maibé ita la’o, ita optimista hela ita la’o neneik ita lalika ansi, klaru sempre iha diferensia opiniaun mas nia prosesu normál. Ha’u hanoin ita kontinua la’o nune’e de’it to’o loron ruma ita bele sai di’ak hanesan nasaun sira seluk. ha’u optimista tebes,” tenik Ministru Dionísio Babo.

“Ha’u hanoin ba juventude sira importante agora ita hotu tenke aprende, tenke koñese didi’ak ita-nia istória haree katak uluk la’ós buat fasil tebes to’o agora ne’e para bele sai hanesan baze ida, para sira bele enxe independénsia ne’e”.

Eis-ministru Justisa iha Sestu Governu Konstitusionál ne’e reforsa, juventude sira agora atu prienxe independénsia la’ós atu halimar de’it, maibé tenke priense ho di’ak. hodi kontinua obra ne’ebé ita-nia antesesór sira halo tiha ona.

Jornalista : Nelia Fernandes

Editor        : Rafy Belo

HAKEREK NO HATÁN

Please enter your comment!
Please enter your name here