Prezidente Repúblika, Francisco Guterres Lú Olo, bainhira halo diskursu iha selebrasaun Loron Proklamasaun Independénsia 28 Novembru 1975 ba dala-44, iha Palásiu Governu, kinta (28/11). Imajen Tatoli/António Gonçalves

DILI, 28 novembru 2019 (TATOLI) – Prezidente Repúblika (PR), Francisco Guterres Lú Olo, konsidera bainhira país ida orienta ona dezenvolvimentu ba rai ho ninia riku-soin no ema, signifika katak hakarak hala’o dezenvolvimentu ida ne’ebé proteje meiu-ambiente no hasa’e produsaun ba bens no servisu, tanba ne’e presiza diversifika ekonomia.

“Ekonomia ne’ebé depende de’it ba produtu ida, halo país fraku no bele lakon nia soberania. Tanba ne’e urjente tebes atu diversifika ita-nia ekonomia, hodi halakon dependénsia ba mina rai no gás liuhosi dezenvolvimentu iha setór produtivu hanesan agro prosesamentu, manufatura no turizmu, peska no sira seluk tán”, diskursu Xefe Estadu iha selebrasaun Loron Proklamasaun Independénsia 28 Novembru 1975 ba dala-44, iha Palásiu Governu, kinta ne’e.

Nia dehan, bainhira país ida sai ezemplu di’ak kona-ba dezenvolvimentu sustentável no ambiente di’ak, liuhosi energia renovável, mak Povu bele moris di’ak liu no bele atrai investimento esternu.

Xefe Estadu observa, durante ne’e Governu koko implementa modelu balun dezenvolvimentu nian, nu’udar prosesu hametin soberania ekonomia país, tanba ne’e bainhira harii Fundu Minarai iha tinan 2005 liubá no osan hahú tama maka’as iha fundu soberanu, Governu hili hasa’e despeza públika maka’as liu fali reseita ne’ebé hetan liuhusi impostu no taxa.

“Kada tinan Orsamentu Estadu hetok boot ba beibeik no la realista, tamba ita rasik lakohi lakon tempu hodi diskute kle’an kona-ba kestaun fundamentál ida mak desekilíbriu orsamentál”, nia akresenta.

Nia nota, reseita ne’ebé tama iha kofre Estadu boot liu mak husi minarai no gás, liu porsentu 90, enkuantu reseits ne’ebé mai husi produsaun rasik hanesan kafé no produtu balun kuaze porsentu 10 de’it, no hetan impostu kiik tamba osan husi mina no gás mak troka fali.

“Ita sente katak fásil liu foti de’it osan husi Fundu Minarai atu taka despeza públika duke uza osan-sira ne’ebé mai liuhosi ita-nia servisu badinas, disiplina, sakrifísiu no matenek rasik. Valór-sira ne’ebé ita aprende liuhusi ita-nia luta libertasaun nasionál, maibe ohin loron ita tau ses tiha”, nia dehan.

Biban ne’e PR mós afirma importánsia atu investe iha setór sosiál ba sidadaun sira hodi bele iha kualidade moris di’ak.

“Urjente tebes atu ita investe maka’as liu iha área saúde no edukasaun ba ita-nia sidadaun sira, hodi hanoin ba jerasaun foun sira no ba ita-nia beioan sira. Ho Povu ida ne’ebé saudável ka ho saúde di’ak, ho edukasaun ida ho kualidade mak ita bele hetan sosiedade ida ne’ebé moris ho bein-estar no progresu, tuir ita-nia Konstituisaun haruka.

Jornalista: Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here