Deputada hosi bankada PLP, Maria Angelina Sarmento. Imajen Egas Cristovão

DILI, 28 novembru 2019 (TATOLI)—Mensajen Prezidente Repúblika (PR), Francisco Guterres ‘Lú Olo’ kona-ba Timor-Leste dependente ba fundu minarai pertenente tanba despeza boot liu kompara ho retornu.

“Mensajen ida-ne’e pertenente tanba ita-nia Estadu, konstituisaun hatuur kona-ba check and balance, órgaun soberania ida iha separasaun podér maibé iha interdependénsia ba malu. Ne’e kna’ar ida hosi Prezidente Repúblika nian atu fó nia pontu devista kona-ba Orsamentu Jerál Estadu”, Vise-Prezidente Parlamentu Nasionál, Deputada Maria Angelina Sarmento, ba jornalista sira, iha resintu Parlamentu Nasionál, kinta ne’e.

Nia dehan, Prezidente Repúblika konstitusionalmente garante unidade nasionál no ida tan maka oinsá atu fó hanoin ba órgaun polítika sira atu haree didi’ak oinsá jere rekursu naturál sira.

Pontu devista Prezidente Repúblika, Francisco Guterres ‘Lú Olo’ nian iha ámbitu Komemorasaun Loron Proklamasaun 28 Novembru ba dala-44, iha Palásiu Governu, kinta ne’e, hateten ekonomia ne’ebé depende de’it ba mina halo nasaun fraku no bele lakon nia soberania.

“Urjente tebes atu diversifika ita-nia ekonomia, hodi halakon dependénsia ba minarai no gás liuhosi dezenvolvimentu ita-nia setór produtivu hanesan agro prosesamentu, manufatura no turizmu, peska no sira seluk tán”, PR Lú Olo esklarese.

Tuir nia katak diversifika ekonomia sei halo Timor-Leste sai ezemplu di’ak ida kona-ba dezenvolvimentu sustentável, ho ambiente ida ke di’ak, liuhosi enérjia renovável hodi nune’e povu bele moris di’akliu no bele atrai investimentu esternu.

Prezidente Repúblika nota katak durante tinan sanulu resin Governu sira ukun ho orsamentu ne’ebé boot no obriga foti osan barak liuhosi Fundu Minarai.

Maibé, dala barak liu ezekusaun orsamentál la to’o pursentu sia-nulu (90). Hahú iha tinan 2005 to’o 2018, transfere ona osan husi Fundu Minarai liu biliaun 10 hodi finansia despeza públika.

Hatán ba preokupasaun ne’e, Deputada Maria Angelina Sarmento haklaken, mensajen Xefe Estadu nian fanu polítiku sira atu liberta povu hosi ki’ak no mukit.

“Ida-ne’e mensajen importante ba ami hanesan polítiku hodi haree filafali saida maka ami bele halo atu hadi’a di’ak liután povu nia moris”,  nia katak.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Uluk sei Diretora FONGTIL, kritika makas los ba PN no Governu foti osan fundu petrolifeiru liu rendimentu sustentavel estimativa (RSE) nia nomos lei pensaun vitalisia maibe ohin loron nuudar deputada iha PN buat hotu sai kontrariu fali

HAKEREK NO HATÁN

Please enter your comment!
Please enter your name here