Membru KEMA hafoin partisipa komemorasaun 28 novembru ba dala 44 iha Munisípiu Aileu. Imajen: Rafy Belo

AILEU, 28 novembru 2019 (TATOLI)-Konsellu Estudante Munisípiu Aileu (KEMA), ne´ebé kompostu estudante universitáriu husi universidade oioin la´o ain hahú husi Dili to´o Munisípiu Aileu hodi partisipa iha serimónia komemorasaun Proklamasaun Independénsia, 28 novembru, ba dala-44.

“Ami-nia jornada ida ne´e hahú husi Dili mai to´o Aileu iha loron 26. Ami-nia jornada, liuhusi Laulara, iha suku haat hanesan Bokolelo, Fatisi, Tohumeta no Madabeno,” Vise-Koordenadór KEMA, Maria do Rosário Alves, ba Ajénsia TATOLI, iha Kampu Tebe Bola, Sabraka Laran, Aileu, hafoin partisipa serimónia komemorasaun 28 novembru, ohin.

Nia haktuir, durante jornada liuhusi suku sira ne´ebé mensionadu sira identifika problema sosiál oioin ne´ebé mak komunidade sira enfrenta.

“Iha ne´ebá ami haree problema oioin ne´ebé mak akontesa iha ne´ebá no problema sira iha ne´ebá mak hanesan infraestrutura bázika, ema vulnerável sira. Nune´e mós problema eletrisidade,” nia haktuir.

Bazea ba situasaun sira ne´e, Joven Aileu ne´e espera katak iha diskusaun Orsamentu Jerál Estadu (OJE) nian husi Parlamentu Nasionál (PN), iha tempu barak, bele diskute no haree mós preokupasaun no problema sira ne´ebé mak komunidade enfrenta, inklui Aileu.

“Orsamentu sira ne´e karik mai, ha´u fiar katak sei jere ba buat sira ne´ebé mak sei falla hela no problema sira ne´ebé mak iha, ha´u hanoin sei rezolve ho di´ak,” konklui Maria do Rosário Alves.

Notísia relevante:Veteranu Aileu Husu Jerasaun Foun Banati Espiritu Eroi Sira

Jornalista: Natalino Costa

Editór     : Rafy Belo

HAKEREK NO HATÁN

Please enter your comment!
Please enter your name here