DILI, 28 novembru 2019 (TATOLI)-Governu liuhosi Ministériu Administrasaun Estatál (MAE) aloka orsamentu $300.000 hodi selebra loron proklamasaun independénsia ba dala-44 (28 novembru 1975-28 novembru 2019).
Notísia Relevante : Estadu Kondekora Sidadaun Na’in-71
Diretór Jerál Administrasaun no Finansa MAE, Ermes Barros, relata, orsamentu ne’e ezekuta ba konsumu, farda ba grupu isár bandeira nasionál, lojístika, feira iha Sentru Konvensaun Dili (CCD-sigla Portugés) no seluk tan.
“Orsamentu $300.000 ne’e iha nasionál, la-inklui munisípiu tanba munisípiu iha orsamentu rasik ba komemorasaun iha tinan ida ne’e,” informa Ermes Barros, ba jornalista sira, ohin, iha m resintu Parlamentu Nasionál.
Nia esplika, hosi totál orsamentu ne’e balun uza ba programa ne’ebé implementa ona antes hanesan dansa-kulturál, feira iha Sentru Konvensaun Dili, programa desportivu halai taru, tata berlindu, halai karón, sa’e-bua, programa misa agradesimentu ne’ebé hala’o ona iha Igreja Katedrál Dili.
Jornalista : Agapito dos Santos
Editór : Francisco Simões
