Komemorasaun 28 novembru ba dala 44 iha Munisípiu Aileu. Imajen: Antónia Maia

AILEU, 28 novembru 2019 (TATOLI)- Administrádor Munisípiu Aileu, João Tilman do Rêgo preokupa ho partisipasaun Funsionáriu Públiku (FP) munisipiu nian iha komemorasaun loron Proklamasaun Independénsia ba dala 44 (28 novembru).

“Ohin komemora loron proklamasaun independénsia ne’ebé maka kontribui mai hosi luta na´in sira, balu sei hamutuk no balun lae ona maibé bainhira ita halo preparasaun funsionáriu barak mak lakohi kontribui no ezije de’it mak sira nia direitu, ne’e governu Sentrál atu fiar ita oinsá? iha formatura funsionáriu laiha,”Administradór hato’o preokupasaun ne’e bainhira halo intervensaun iha ámbitu komemorasaun loron proklamasaun independénsia ba dala 44 iha kampu tebe bola, Sabraka-laran, Munisípiu Aileu, ohin.

Alende ne’e, autoridade másima Aileu ne’e mós preokupa ho prezensa profesor sira ne’ebé maka la marka prezensa maibé estudante ativu másima tebes iha eventu istóriku ne’e.

“Iha formatura funsionáriu laiha, profesór mós laiha, maibé estudante iha, profesór hanorin patriotizmu no nasionalizmu ba estudenta sira maibé liafuan rua ne’e iha realidade, la aplika iha ita-nia munisípiu,” Administradór João Tilman do Rêgo.

Preokupasaun Autoridade Munisipál ne’e preokupa tanba planu governu da-ualu nian katak atu habadak governasaun nia atendimentu ba iha komunidade hahú hosi munisípiu to’o iha baze. Maibé Munisípiu hanesan servidór hodi hatutan governu nia liman ain iha baze maibé lakohi kontribui. “Funsionáriu sira dala barak ejize liu direitu maibé dever la halo”.

Tanba ne’e, Administradór João Tilman do Rêgo husu funsionáriu hotu atu tau iha konsiénsia katak loron Nasionál sira hanesan 20 maiu (loron restaurasaun independénsia), 28 novembru (loron proklamasaun independénsia) no loron nasionál sira seluk ne’e ba timoroan hotu no fó netik tempu hodi komemora tanba sira (éroi) maka ohin loron ita sira moris bele goza ukun aan.

Hatán ba preokupasaun Administradór relasiona ho partisipasaun profesór sira, Diretora Servisu Munisípal Edukasaun Juventude no Desportu Aileu, Cristina da Conceição rekoñese katak partisipasaun profesór sira iha formatura laiha tanba profesór sira bainhira atu treina ba formatura ba tuir tiha formasaun.

Diretora Servisu Munisípal Edukasaun Juventude no Desportu Aileu, Cristina da Conceição. Imajen: Antónia Maia

“Ha’u rekoñese duni katak profesór sira laiha tanba sira ba hotu tuir formasaun. Maske ohin loron feriadu maibé atu tama iha formatura persiza treina. Tinan-tinan sempre hili profesór na´in 31 atu tuir formatura maibé tinan ne’e ami deside tiha profesór sira ne’e tuir formasaun akadémika ba Baxarelatu entaun fó responsabilidade ba sira iha Aileu vila mas nafatin lahetan tanba sira mós tuir hotu formasaun,” klarifika Diretora Servisu Munisípal Edukasaun Juventude no Desportu Aileu ne’e.

Entretantu grupo ne’ebé tama iha formatura iha komemorasaun 28 novembru iha Aileu kompostu hosi Komandu Polísia Munisípiu Aileu, Seguransa sívil, Korpu Bombeiru, Eskuteiru, no Estudante sira.

Jornalista: Antónia Gusmão

Editór    : Rafy Belo

HAKEREK NO HATÁN

Please enter your comment!
Please enter your name here