Prezidente Repúblika, Francisco Guterres Lú Olo, jantar konfraternizasaun ho agrasiadu Orden Timor-Leste sira no reprezentante mártir luta libertasaun nasionál, iha Palásiu Prezidensiál Bairro Pité, kuarta kalan (27/11). Imajen/Mídia PR

DILI, 27 novembru 2019 (TATOLI) – Prezidente Repúblika (PR), Francisco Guterres Lú Olo, oferese jantar konfraternizasaun ba agrasiadu Orden Timor-Leste sira no reprezentante mártir luta libertasaun nasionál, iha Palásiu Prezidensiál Bairro Pité, kuarta kalan.

Iha diskursu, Xefe Estadu hateten, hasoru malu ida ne’e atu hatutan haksolok ba malu molok selebra loron Proklamasaun Independénsia ba dala-44.

“Ita sei han-hemu hamutuk no aproveita konvíviu ida-ne’e atu kontinua fahe ba malu ida-idak ninia esperiénsia luta, atu hatene liután kona-ba kompañeiru ka kompañeira ida nia terus iha ai-laran no iha prizaun iha Timor-Leste ka iha Indonézia, no mós atu buka hatene mós oinsá ita hahú organiza ita-nia luta no oinsá ita koordena malu iha Frente Armada, Frente Klandestina no Frente Esterna to’o hetan Ukun Rasik-aan liuhosi Referendu. Ema ida, istória ida, ho istória ida-idak nian, mak ita halo istória tomak Timor-Leste nian. Istória luta ida ne’ebé nakonu ho barani no determinasaun kahur ho terus no halerik rohan-laek”, tenik PR Lú Olo.

Xefe Estadu temi katak, iha serimónia 28 Novembru nian, ho naran Estadu Timor-Leste liuhosi kondekorasaun Orden Timor-Leste, Prezidente Repúblika sei hatutan rekoñesimentu erói nasionál no mártir sira, ba ida-idak ninia kna’ar, iha eskalaun oioin, ho ninia méritu rasik, durante luta libertasaun nasionál.

Alende ne’e, sei rekoñese mós belun estranjeiru ida, ne’ebé hanesan jornalista no ativista, Saskia Kouwenberg.

Lú Olo rekoñese katak, tanba maluk barak tebes mak mate ona no la iha rejistu detalladu, eskritu ka gravadu, kona-ba eventu hotu no ida-idak ninia kontribuisaun, no memória sobrevivente sira-nian mihis dadaun ona, rekoñesimentu husi Estadu Timor-Leste ba erói no mártir sira bele sai ladún justu.

“Tanba ne’e Membru Konsellu Agrasiamentu no Orden Onorífika husi Prezidénsia Repúblika tuun ba agrasiadu sira-nia hela-fatin no ko’alia ho família no kompañeiru luta sira, hodi hahú halibur ka kompleta dadus kona-ba eis-kombatente ida-idak, no konsellu ne’e halo esforsu tomak atu kondekorasaun aban nian bele monu ba hotuhotu nia laran. Obrigadu ba membru sira Konsellu Agrasiamentu no Orden Onorífika no maluk hothotu nia esforsu”,nia agradese.

Nia hatutan, iha komemorasaun 28 Novembru, Prezidente Repúblika sei kondekora Komandante no soldadu husi glorioza Forsa Armada Libertasaun Nasionál Timor-Leste ka FALINTIL no membru sira seluk iha komponente armada.

Xefe Estadu mós rekoñese katak, Kaer kilat la tama kedas iha pensamentu núkleu klandestinu nian bainhira grupu kiikoan ida ne’e hahú halibur, iha kantu-kantu Dili nian iha dékada 70, hodi haree oinsá kore Timor-Leste husi kolonialismu portugés.

Tanba sira-nia pensamentu halai liu ba oinsá sensibiliza no hametin Unidade Nasionál iha rai ida ne’ebé timoroan sira moris keta-ketak nu’udar Reinu, ho ida-idak ninia liurai rasik, ho etnia oioin, ho lian oioin, ho hakarak oioin.

“Laiha, iha tempu ne’ebá, sentidu Povu no sentidu Pátria. Maioria Povu la hatene lee no hakerek. Oinsá loos mobiliza atu hothotu, bele hakoak hanoin Ukun Rasik-aan”, nia akresenta.

Nune’e, Xefe Estadu hanoin katak tanba fó importánsia boot ba faze dahuluk hahú organiza-aan, nu’udar sidadaun timoroan, iha serimónia loron Proklamasaun Independénsia nian, mak Estadu sei rekoñese maluk balun ne’ebé tau neon hamutuk no haburas liután movimentu nasionalista no espíritu fiar-aan, bainhira sira tuun rasik ba Povu nia hela-fatin.

Liuhusi edukasaun polítika, poezia no hananu revolusionáriu, kampaña alfabetizasaun no ba saúde di’ak, oinsá organiza-aan no hamutuk ba moris-di’ak, liuhusi kooperativa maluk sira ne’e kuda dadaun iha tempu ne’ebá, espíritu patriótiku, simu malu no moris ho kbiit rasik.

Nia haktuir, bainhira militár indonéziu tama Timór, Povu iha tiha ona sentidu Pátria no sentidu Povu ida de’it. Iha tempu ne’ebá, maluk feto sira manán tiha ona rekoñesimentu husi líder sira atu sai ajente ativu iha sosiedade. Hafoin invazaun indonézia, Baze Apoiu sai eskola boot ida ne’ebé hatutan no hametin liután sentidu Pátria no sentidu Povu ida de’ it, maski iha diferensa oioin.

Nune’e, iha serimónia 28 Novembru nian, Prezidente Repúblika sei kondekora mós líder polítiku no mártir balun ne’ebé kontribui maka’as iha faze ne’ebé Timór hahú organiza-aan ba Ukun Rasik-aan molok invazaun indonézia no iha períodu Baze Apoiu.

“Sira-nia legadu sei iha impaktu ohin loron ba timoroan hotu, nu’udar Povu ho hanoin no hakarak rasik. Tanba ne’e ho laran-haksolok tebes mak Prezidente Repúblika simu faluk no oan-kiak sira husi ita-nia mártir no erói nasionál sira. Jerasaun Patriota marka mós prezensa iha ne’e”, PR espresa ho haksolok.

Alende ne’e, Xefe Estadu mós sita katak, iha alin-joven, oan-kiak na’in-19 mak sei simu kondekorasaun inan ka aman nian, iha serimónia loron Proklamasaun nian.

“Ita hotu hein katak ita-nia oan kiak sira ne’e sei organiza-aan, hamutuk ho grupu hanaran Jerasaun Patriota, hodi hatutan sira-nia aman no inan ninia legadu, sai kontinuadór ba ita hothotu ninia hakarak ohin loron, kaer metin ba bebeik prinsípiu no valór ne’ebé halo ita hadomi tebetebes ita-nia Povu no Nasaun Timor-Leste”, Xefe Estadu salienta.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here