Prezidente Repúblika, Francisco Guterres Lú Olo. Imajen Tatoli/António Gonçalves

DILI, 27 novembru 2019 (TATOLI)–Prezidente Repúblika (PR), Francisco Guterres Lú Olo, ezerse ninia kompeténsia konstitusionál hodi fó indultu totál ka livre no parsiál ka hamenus pena prizaun ba prizioneiru na’in-ualu (8) iha loron Komemorasaun Proklamasaun Independénsia ba dala-44, 28 novembru 2019.

Komunikadu ne’ebé TATOLI asesu hosi Mídia Prezidénsia Repúblika via email, kuarta ne’e, esplika Prezidente Repúblika fó indultu ba prizioneiru hirak-ne’e bazeia ba ninia kompeténsia eskluziva tuir Dekretu Prezidente Repúblika númeru 51/2019, 52/2019, 53/2019, 54/2019, 55/2019, 56/2019, 57/2019, iha loron-27 fulan-novembru, hafoin rona Governu.

Prizioneiru sira-ne’ebé hetan indultu totál mak hanesan Juliana Vidigal da Silva no Amancio Lopes. Entretantu, prizioneiru sira-ne’ebé hetan indultu parsiál hodi hamenus pena fulan-6 mak hanesan Donato Fernandes, Ercio da Conceição no João Miguel Arcanjo do Rego Correia Matos, tinan-1 ba Etelvino Costa Saldanha no tinan-2 ba Zeferino da Silva Soares no Marcelo Soares.

Tuir artigu 85 alínea 1 husi Konstituisaun Repúblika hateten katak Prezidente Repúblika de’it mak bele fó indultu ka hamenus kastigu, hafoin rona Governu ne’ebé konjuga ho artigu 3 no 4 Lei númeru 5/2016, 25 maiu.

Definisaun saida mak indultu no hamenus kastigu haktuir iha Kódigu Penál ne’ebé aprova ho Dekretu-Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu. Prezidente Repúblika halo nia kompeténsia tuir de’it lei haruka.

Dekretu Prezidente sira-ne’e sei tama vigór iha 28 novembru 2019.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here